Урысые Федерацием и Правительствэ мэзаем и 12-м зэхэсыгъоу иIагъэм къуаджэхэм хэхъоныгъэ ягъэшIыгъэным тегъэпсыхьагъэу сомэ миллиарди 3,5-м ехъурэ субсидиехэр шъолъыр 22-мэ къафыхагъэкIынэу щырахъухьагъ. Ащ щыщэу сомэ миллион 449,4-рэ Адыгэ Республикэм къыIукIэщт. Шъугу къэтэгъэкIыжьы Урысые Федерацием и Правительствэ и Тхьаматэу Михаил Мишустиныр бэмышIэу Адыгеим къызэкIом а Iофыгъор къызэраIэтыгъагъэр.Урысые Федерацием и Правительствэ иIэпэчIэгъэнэ фонд ары мылъкур къызыхагъэкIыщтыр. Ащ ехьылIэгъэ унашъор Урысые Федерацием и Правительствэ зиштагъэр Урысые Федерацием и Федеральнэ ЗэIукIэ бюджет мылъкур атегощэгъэнымкIэ икомиссие ащ къызы­дырегъэштэ нэуж ары. Адыгеим ыцIэкIэ Къэралыгъо Думэм идепутатэу Владислав Резник ащкIэ IэпыIэгъу къафэхъугъ. «Парламент комиссиемрэ Урысые Федерацием и Правительствэрэ ахъщэ тедзэу къы­хагъэкIыгъэр Адыгеим исхэм щыIэкIэ дэгъу яIэным фэIорышIэщт, инфраструктурэ проект заули ащкIэ аухыжьыщт», — къыIуагъ Владислав Резник. «Къэралыгъо программэмкIэ гухэлъ шъхьа­Iэ­хэмрэ республикэм ищыкIагъэхэмрэ зэтефэх. ЦIыфхэр къуаджэхэм ащыпсэунхэм ыкIи Iоф ащашIэным, къэлэдэсхэм яIэ псэукIэм фэдэ ахэм афызэхэтщэным тэркIэ мэхьа­нэшхо иI», — хигъэунэфыкIыгъ КъумпIыл Мурат. Адыгэ Республикэм мэкъу-мэщымкIэ и Министерствэ къызэритыгъэмкIэ, къэралыгъо программэм къыды­хэлъытагъэу Адыгэ Республикэм 2020-рэ илъэсым газрыкIопIэ километрэ 71,4-рэ, псырыкIопIэ километрэ 12,9-рэ, электроэнергиер зэрыкIорэ линие километри 4, гъогу километри 7,47-рэ, культурэм иунитIу, фельдшер-мамыку IэзапIэ, цIыфхэм япсауныгъэ зыщагъэпытэрэ физкультурэ парк цIыкIу щагъэпсыгъ. Джащ фэдэу къуаджэхэм язэтегъэпсыхьанкIэ проект 12 агъэцэкIагъ, фельдшер-мамыку IэзапIэм, культурэмкIэ уни 5-мэ, кIэлэцIыкIу IыгъыпIи 3-мэ, зы гурыт еджапIэм гъэцэкIэжьын IофшIэнхэр арашIылIагъэх. Псауны­гъэм икъэухъумэн фэгъэзагъэхэм апае автотранспорт 16, гурыт еджэпIи 8-мэ апае автобусхэр къащэфы­- гъэх. АР-м и ЛIышъхьэ ипресс-къулыкъу