Республикэм и ЛIышъхьэу КъумпIыл Мурат АР-м и Лъэпкъ музей тыгъуасэ щыIагъ. Псэуалъэм изэтегъэпсыхьан ыкIи ащ къыпашIыхьажьырэ фондым игъэтIылъыпIэ ишIын зэрэлъыкIуатэрэм зыщигъэгъозагъ.Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэмрэ ащ игуадзэу Шъэо Аскэррэ, республикэм культурэмкIэ иминистрэу Аулъэ Юр, Мыекъуапэ имэрэу Андрей Гетмановыр, IофшIэнхэм афэгъэзэгъэ организацием илIыкIохэр. — Лъэпкъ музеир Адыгеим ынапэу щыт. Адыгэхэм ятарихъ, якультурэ ыкIи ящыIакIэ къизыIотыкIырэ пкъыгъуабэ мыщ щыугъоигъ. А тибаиныгъэ тыфэсакъын ыкIи тынаIэ тедгъэтын фае. Проектыр гъэцэкIагъэ зыхъурэ нэуж уасэ зыфэпшIын умылъэкIыщт экспонатхэр нахь цIыфыбэмэ зэрагъэлъэгъун амал щыIэ хъущт, — къыхигъэщыгъ КъумпIыл Мурат. Республикэ инвестиционнэ программэм къыдыхэлъытагъэу псэолъэшI IофшIэнхэр блэкIыгъэ илъэсым рагъэжьагъэх. Проектым игъэцэкIэн сомэ миллион 248-рэ фэдиз тефэщт. 2020-рэ илъэсымкIэ агъэнэфэгъэ мылъкур зэкIэ гъэфедагъэ хъугъэ. Непэрэ мафэм ехъулIэу музеим IофшIэнхэр щэкIох, чIэхьэгъум дэжь гранитым хэшIыкIыгъэ пкъыгъохэр щагъэтIылъы­гъэх. Джащ фэдэу квадратнэ метрэ мини 2 фэдиз зэрылъ къатищэу зэтет фонд гъэтIылъы­пIэм ипсэуалъэ ашIыгъ. 2021-рэ илъэсым тыгъэгъазэм ехъулIэу IофшIэнхэр аухынхэу агъэнафэ. Музеим ищагу кIоцI къэгъэлъэ­гъопIэ чIыпIитIу ыкIи адыгэхэм яшэн-хабзэ диштэрэ унэ къыдэуцощтых.