Адыгэ Республикэм и ЛIышъхьэу КъумпIыл Мурат коммерческэ банкэу «Кубань кредит» зыфиIорэм илъыплъэкIо совет итхьаматэу Виктор Бударинымрэ зэфэшIыгъэ Iахьзэхэлъ обществэу «ОБД-м» игенеральнэ пащэу Александр Залуцкэмрэ зэIукIэгъоу адыриIагъэм псэолъэшIыным ылъэныкъокIэ язэдэлэжьэныгъэ зэрагъэпытэщтым щытегущыIагъэх. ЗэIукIэгъум хэлэжьагъэх республикэм ивице-премьерэу Сапый Вячеслав, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, Мые­къуапэ имэрэу Андрей Гетмановыр, нэмыкIхэри. Шъугу къэдгъэкIыжьын, зянэ-зятэ зимыIэжь сабыйхэм апае Мыекъуапэ унэхэр щышIыгъэнхэм мы компаниитIум яIахьышIу хэлъ. Къэлэ администрацием 2015-рэ илъэсым «ОБД-м» ышIыгъэ фэтэри 153-рэ зыхэт унэр, ащ къыкIэлъыкIогъэ илъэсхэм атыгъэ унэхэм ахэт фэтэр 46-рэ къыщищэфыгъэх, ахэр зытефэхэрэм атырагощагъэх. Язэпхыныгъэ агъэпытэным фэшI респуб­ликэмрэ банкэу «Кубань кредит» зыфиIорэмрэ 2018-рэ илъэсым зэзэгъыныгъэм зэдыкIэтхагъэх. Мы илъэс дэдэм компанием иофис Мыекъуапэ къыщызэIуихыгъ. — ТапэкIи тизэдэлэжьэн лъыдгъэ­кIотэным тыфэхьазыр. ПсэолъэшI проектышхохэм ягъэцэкIэн непэ Адыгеир ахэлажьэ, арышъ цыхьэ зыфэтшIын тлъэкIыщт гъусэхэр тиIэнхэм тэркIэ мэхьанэшхо иI, — къы­Iуагъ республикэм ипащэ. Инвестиционнэ IофшIэным къыдыхэлъытагъэу шъолъырым ыгъэнэфэгъэ псэупIэ программэхэм ягъэцэкIэн ып­шъэ­кIэ зигугъу къэтшIыгъэ банкри псэолъэшI организациери къыхэлэжьэнхэу гухэлъ яI. «ОБД-м» ышIырэ унэм хэт фэтэр 24-рэ зянэ-зятэ зимыIэжьхэм афищэфынхэу къэлэ администрацием мы илъэсым ыгъэнэфагъ. Адыгэ Республикэм и ЛIышъхьэ ипресс-къулыкъу