«Культурэм» къыдыхэлъытагъэу ашIыгъэхэм
Мы мэфэ дэдэм АР-м и ЛIышъхьэ лъэпкъ проектэу «Культура» зыфиIорэм къыщыдэлъытагъэхэр районым зэрэщыпхыращыхэрэми зыщигъэгъозагъ.
Къутырэу Казеннэ-Кужорскэм культурэм и Унэу дэтым апэ екIолIагъ. Ар икIыгъэ илъэсым агъэкIэжьыгъ. Федеральнэ, республикэ ыкIи чIыпIэ бюджетхэм къахэхыгъэ сомэ миллиони 10,3-кIэ унашъхьэр, псым, фабэм ыкIи электричествэм якIуапIэхэр, шъхьаныгъупчъэхэр, пчъэхэр зэблахъугъэх, гъурыжъкIэ дэпкъхэр агъэпкIагъэх, ыкIоцI ашIыжьыгъ. Ащ нэмыкIэу етIани муниципальнэ образованием ахъщэ къыхигъэкIи гъэстыныпхъэ шхъуантIэр ращэлIагъ, псэуалъэхэр, культурнэ Iофтхьабзэхэр щызэхащэнхэм пае ящыкIэгъэ оборудованиер къащэфыгъэх.
АР-м и ЛIышъхьэ IофшIэнхэр зэрэрашIылIагъэхэр зэригъэлъэгъугъ, ипащэхэмрэ Iоф щызышIэхэрэмрэ гущыIэгъу афэхъугъ, ащ хэт библиотекэу агъэкIэжьыгъэми чIэхьагъ.
Нэужым КъумпIыл Мурат къуаджэу Фэдз кIуагъэ. Лъэпкъ проектэу «Культурэм» къыдыхэлъытагъэу ащ унакIэ щашIыгъ. 2018-рэ илъэсыр ары зырагъэжьагъэр, 2020-м ыкIэм аухыгъ. Унэм ишIын пстэумкIи сомэ миллион 52-рэ пэIухьагъ. Район бюджетым къыхэхыгъэ ыкIи мыбюджет ахъщэмкIэ псэуалъэу ищыкIагъэхэр чIагъэуцох.
ЛIышъхьэр кIэлэцIыкIу творческэ коллективэу ащ щызэхащагъэм икъэтын еплъыгъ, нэужым къуаджэм инахьыжъхэм аIукIагъ. Ахэм лъэшэу къыфэразэхэу республикэм ипащэ зыкъыфагъэзагъ, культурэм и УнакIэу афашIыгъэм пае «тхьауегъэпсэу» къыраIуагъ.
УФ-м и Президент къоджэ псэупIэхэм хэхъоныгъэхэр ягъэшIыгъэнхэм лъэшэу ынаIэ зэрэтетым, культурэм иунэхэр анахьыбэу мэхьанэ зиIэ социальнэ псэуалъэхэм зэращыщхэм КъумпIыл Мурат къыкIигъэтхъыгъ.
— Культурэм и Унэхэр къоджэдэсхэр анахьыбэу зэкIолIэрэ гупчэхэу хъунхэ фаеу сэлъытэ. Лъэпкъхэм якультурнэ кIэн ахэм къащызэтырагъанэ ыкIи зыщарагъэушъомбгъу, ныбжь зэфэшъхьафхэм ялIыкIохэр ащызэIокIэх, лIэужхэр яопыткIэ ащызэдэгуащэх. Арышъ, федеральнэ гупчэр тиIэпыIэгъоу, мыщ фэдэ учреждениехэм IофшIэкIэ амал тэрэзхэр яIэ хъунхэм ыуж тит, — къыIуагъ АР-м и ЛIышъхьэ.
ХЪУТ Нэфсэт.