Адыгэ Республикэм и Общественнэ палатэ 2020-рэ илъэсым Iофэу ышIагъэр зыщызэфахьысыжьыгъэ ыкIи 2021-рэ илъэсым анахьэу ынаIэ зытыригъэтыщт лъэныкъохэр зыщагъэнэфэгъэ зэхэсыгъоу иIагъэм Адыгэ Республикэм и ЛIышъхьэу КъумпIыл Мурат хэлэжьагъ.

Джащ фэдэу Iофтхьабзэм хэлэжьа­гъэх АР-м и Къэралыгъо Совет – Хасэм и Тхьаматэу Владимир Нарожнэр, рес­публикэм и ЛIышъхьэрэ министрэхэм я Кабинетрэ я Администрацие ипащэу Владимир Свеженец, УрысыемкIэ Iоф­шIэным и ЛIыхъужъэу, УФ-м и Общественнэ палатэ хэтэу, Адыгеим, Къэ­бэртэе-Бэлъкъарым, Къэрэщэе-Щэр­джэсым янароднэ тхакIоу МэщбэшIэ Исхьакъ, общественнэ организациехэм ялIыкIохэр. Зэхэсыгъор зэрищагъ Адыгэ Респуб­ликэм и Общественнэ палатэ итхьаматэу Устэ Руслъан.

Адыгеим и ЛIышъхьэ зэхэсыгъом хэлажьэхэрэм закъыфигъазэзэ, мэхьанэ зиIэ пшъэрылъхэм язэшIохынкIэ къэралыгъо хабзэм икъулыкъухэмрэ респуб­ликэм иобщественникхэмрэ чанэу зэрэзэдэлажьэхэрэм ишIуагъэ къызэрыкIорэр хигъэунэфыкIыгъ.

— Обществэмрэ хабзэмрэ зэпхыныгъэ яIэнымкIэ Общественнэ палатэр площадкэ шъхьаIэу щыт. Шъо социальнэ куп зэфэшъхьафхэм яеплъыкIэхэр къе­шъоIотыкIых, министерствэхэм ыкIи ведомствэхэм япхыгъэ общественнэ советхэр, комиссиехэр, IофышIэ купхэр шъогъэпсых, гъэцэкIэкIо ыкIи хэбзэгъэ­уцу къулыкъухэм ашIэрэм шъулъэплъэ, — къыIуагъ КъумпIыл Мурат.

Адыгеим и ЛIышъхьэ къызэрэхигъэщыгъэмкIэ, мыщ фэдэ зэдэлэжьэныгъэм ашIэгъэ IофшIэным уасэ ыкIи мы уахътэм агъэцакIэрэм гъэтэрэзыжьынхэр игъом фашIынхэ амал къеты. Джащ фэдэу, общественностым илIыкIохэм еплъыкIэу яIэр ыкIи предложениеу къа­хьыхэрэр шъолъырым игъэIорышIэкIо командэхэм къыдыхалъытэнхэу ЛIышъхьэм къариIуагъ.

— Республикэм хэхъоныгъэ ышIынымкIэ ыкIи къиныгъохэр зэпичынымкIэ цIыфхэр зэкъоуцонхэм фэхьазырых. ИкIыгъэ илъэсым ар дэгъоу нафэ къытфишIыгъ. ГумэкIыгъо тызщыхэтыгъэ мазэхэм тиIорэ тишIэрэ зэхэлъэу тызэрэзекIуагъэм ишIуагъэкIэ пандемием изытет тылъыплъэн, Iофыгъо шъхьаIэу тишъолъыр къыщыуцухэрэм язэшIохын лъыдгъэ­кIотэн тлъэкIыгъ. Общественнэ организациехэм, гуфит объединениехэм яамал­хэмкIэ социальнэ IэпыIэгъу зищыкIагъэхэм арагъэгъотыгъ. АщкIэ ахэм лъэ­шэу тафэраз, — къыIуагъ КъумпIыл Мурат.

АР-м и Общественнэ палатэ итхьаматэу Устэ Руслъан икIыгъэ илъэсым изэфэхьысыжьхэм къатегущыIагъ. Ащ зэрэхигъэунэфыкIыгъэмкIэ, общественнэ уплъэкIунхэм къадыхэлъытэгъэ федеральнэ хэбзэгъэуцугъэ 42-мэ япроект­хэм ахэплъагъэх. Урысыем и Общественнэ палатэ къикIыгъэ тхыгъэхэм ыкIи унашъохэм, цIыфхэм лъэIоу закъы­зэрафагъэзагъэхэм илъэсыр екIыфэ Iоф адашIагъ.

Общественнэ палатэр республикэм щыкIогъэ Iофтхьабзэхэм зэрахэлэжьагъэм фэгъэхьыгъэ докладхэр зэхэсы­гъом къыщашIыгъэх Урысые общественнэ шIушIэ фондэу «Урысые кIэлэцIыкIу фондым» и Адыгэ республикэ къутамэ иправление итхьаматэу Татьяна Гоголевам, ныбжьыкIэ дзэ-патриотическэ объединениеу «ЗыкIыныгъ» зыфиIорэм итхьаматэу Джарымэ Рэщыдэ, Адыгэ республикэ обществэу «Урысыем иермэлхэм я Союз» итхьаматэу Оник Нигоевым, АР-м имедицинэ IофышIэхэм я Ассоциацие итхьаматэу Валерий Ковалевым, цIыфым ифитыныгъэхэмкIэ Уполномоченнэу АР-м щыIэ Анатолий Осокиным.

Адыгеим и ЛIышъхьэ икIыгъэ илъэсым палатэм иIофшIэн осэшIу фишIыгъ ыкIи ащ итхьаматэу Устэ Руслъан зэрэфэразэр къыхигъэщыгъ. Шъугу къэдгъэкIыжьын, АР-м и Общественнэ палатэ хэтхэр кIэу гъэнэ­фэ­жьыгъэхэу 2021-рэ илъэсым мэлы­лъфэ­­гъум яIофшIэн рагъэжьэжьыщт.

Iэшъынэ Сусан.