ЗэIукIэгъу зэдыряIагъ
Адыгеим и ЛIышъхьэу КъумпIыл Муратрэ цIыфым ифитыныгъэхэмкIэ Уполномоченнэу Адыгэ Республикэм щыIэ Анатолий Осокинымрэ Адыгэ Республикэм и Правительствэ зычIэт унэм тыгъуасэ зэIукIэгъу щызэдыряIагъ.
Джащ фэдэу Iофтхьабзэм хэлэжьагъэх Адыгэ Республикэм и ЛIышъхьэрэ министрэхэм я Кабинетрэ я Администрацие ипащэу Владимир Свеженец, республикэм ивице-премьерэу Наталья Широковар, Адыгеим IофшIэнымрэ социальнэ хэхъоныгъэмрэкIэ иминистрэу Мырзэ Джанбэч, АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Евгений Лебедевыр.
Республикэм щыпсэухэрэм яIофыгъохэм язэшIохынкIэ хэбзэ къулыкъухэмрэ Уполномоченнэмрэ язэдэлэжьэныгъэ мэхьанэшхо зэриIэр республикэм и ЛIышъхьэ хигъэунэфыкIыгъ.
«ЦIыфхэм яфитыныгъэхэмрэ яшъхьафитыныгъэрэ якъэухъумэнкIэ тэри Уполномоченнэми Iофышхо тэшIэ. Апэрэхэм уащыщэу о цIыфхэм ягумэкIыгъохэм ащыгъуазэ охъу ыкIи уиполномочиехэм уарымыкIэу ахэм IэпыIэгъу ягъэгъотыгъэнымкIэ апэрэ лъэбэкъухэр ошIы», — къыIуагъ КъумпIыл Мурат.
Анатолий Осокиным къызэриIотагъэмкIэ, 2020-рэ илъэсым цIыфхэм ятхылъ 363-рэ Уполномоченнэм къыIукIагъ. 2019-рэ илъэсым егъэпшагъэмэ, гъэрекIо къаIукIагъэр процент 34-кIэ нахь мэкIагъ.
ЦIыфхэр анахьэу зыгъэгумэкIыщтыгъэхэр унагъом, ным, кIэлэцIыкIухэм, псауныгъэм якъэухъумэн, медицинэ IэпыIэгъу ятыгъэным, IофшIэнымкIэ яфитыныгъэхэм якъэухъумэн япхыгъэ Iофыгъохэр ары.
ГъэрекIо коронавирусым пэуцужьыгъэнымкIэ Уполномоченнэми Iофышхо ышIагъ. Республикэм и ЛIышъхьэ и УказкIэ Анатолий Осокиныр Адыгеим иоперативнэ штаб хагъэхьагъ.
«Тэ анахьэу тызфэгъэзэгъагъэр цIыфхэм упчIэжьэгъу IэпыIэгъу яттыныр, ахэм ялъэIухэр цIыфхэр социальнэу зыухъумэрэ къулыкъухэмрэ волонтерхэмрэ алъыдгъэIэсынхэр ары. ЦIыфхэм правовой IэпыIэгъу ягъэгъотыгъэным тегъэпсыхьагъэу хабзэм инэмыкI къулыкъухэм пчъагъэрэ зафэзгъэзэн фаеу хъугъэ», — къыIуагъ Анатолий Осокиным.
КъумпIыл Мурат Уполномоченнэм 2020-рэ илъэсым дэгъоу Iоф ышIагъэу ылъытагъ. Гъот макIэ зиIэ унагъохэм арыс кIэлэеджакIохэр ыпкIэ хэмылъэу зэрагъашхэхэрэм гъунэ нахь лъыфыгъэн зэрэфаем ащ ынаIэ тырыригъэдзагъ. Шъугу къэтэгъэкIыжьы а гухэлъхэм апае мыгъэ республикэ бюджетым Iахьтедзэу сомэ миллион 22-рэ къызэрэхагъэкIыщтыр.