ИIофшIэн осэшIу къыритыгъ
Адыгеим и ЛIышъхьэу КъумпIыл Мурат Адыгэ Республикэм ипрофсоюзхэм яфедерацие итхьаматэу Устэ Руслъан Адыгэ Республикэм и Правительствэ зычIэт унэм зэIукIэгъу тыгъуасэ щыдыриIагъ. 2020-рэ илъэсым организацием Iоф зэришIагъэм ахэр тегущыIагъэх.
ЛэжьакIохэм яфитыныгъэхэмрэ яфедэхэмрэ якъэухъумэнкIэ, республикэм социальнэ-экономикэ хэхъоныгъэ ышIынымкIэ профсоюзхэм мэхьанэшхо зэряIэр республикэм и ЛIышъхьэ зэхэсыгъом щыхигъэунэфыкIыгъ.
«Илъэсыбэ хъугъэу хэбзэ къулыкъухэмрэ лэжьэкIо коллективхэмрэ язэпхыныгъэ нахь гъэпытэгъэным Iоф дэтэшIэ. Пшъэрылъ шъхьаIэу тиIэр лэжьакIохэм яфитыныгъэхэмрэ яфедэхэмрэ къэтыухъумэнхэр, фэныкъуагъэ зиIэхэм социальнэ IэпыIэгъу ядгъэгъотыныр ары. Республикэм иорганизациехэмрэ ипредприятиехэмрэ нахь шIуагъэ къытэу Iоф ашIэным, экономикэмрэ социальнэ лъэныкъомрэ хэхъоныгъэ ягъэшIыгъэным, цIыфхэм ящыIэкIэ-псэукIэ зыкъегъэIэтыгъэным фэIорышIэ», — къыIуагъ Адыгеим и ЛIышъхьэ.
БлэкIыгъэ илъэсым федерацием анахьэу Iоф зыдишIагъэхэм Устэ Руслъан къатегущыIагъ. Пандемием ыпкъ къикIыкIэ лэжьэкIуабэмэ IофшIэнымкIэ амалэу яIэр нэмыкI хъугъагъэ. Профсоюзхэм пшъэрылъ шъхьаIэу яIагъэр пэIудзыгъэ шIыкIэм тетэу лэжьагъэхэм, IофшIэгъу мэфэ имыкъум техьагъэхэм яфитыныгъэхэр амыукъонхэр ары.
Профсоюзым хэтхэм ямызакъоу, фэныкъорэ пстэуми правовой IэпыIэгъу арагъэгъотыгъ. ПстэумкIи медицинэ IофышIэ, кIэлэегъэджэ, культурэм иIофышIэ 300-м ехъумэ ятхылъхэр къаIэкIэхьагъэх.
«Коронавирусыр къызэутэлIагъэхэм ахъщэкIэ IэпыIэгъу тафэхъугъ. Профсоюз къулыкъухэр ябюджетхэм ахэплъэжьхи, ащ фэдэ сымаджэхэм ахъщэ IэпыIэгъу ягъэгъотыгъэным анахьэу анаIэ тырагъэтыгъ», — хигъэунэфыкIыгъ Адыгэ Республикэм ипрофсоюзхэм яфедерацие итхьаматэ.
ПстэумкIи коронавирусыр къызэутэлIэгъэ нэбгырэ 1700-мэ сомэ миллиони 6,8-рэ аратыгъ. Ащ щыщэу сомэ миллиони 3,5-р медицинэ IофышIэхэм афагощыгъ.
Республикэм и ЛIышъхьэ 2020-рэ илъэсым федерацием дэгъоу Iоф ышIагъэу ылъытагъ, организацием хэбзэ къулыкъухэм зэдэлэжьэныгъэу адыриIэр ыгъэлъэшынэу, пэублэ профсоюз организациехэм заригъэушъомбгъунэу пащэм пшъэрылъ фишIыгъ.
Адыгэ Республикэм и ЛIышъхьэ ипресс-къулыкъу