Адыгеим ижурналистхэу, гъэзетым игъэдэхэн ыкIи тхылъ къыдэгъэкIыным пылъхэу зиIофшIэн анахь дэгъоу зыгъэцакIэхэрэм Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ищытхъу тхылъхэр джырэблагъэ аратыжьыгъэх. — Пандемием къыздихьыгъэ къиныгъохэм ямылъытыгъэу шъолъырым икъэ­барлъыгъэIэс амалхэм яIофышIэхэм игъом ыкIи щытхъу хэлъэу япшъэрылъхэр агъэцакIэх. Илъэсэу икIыгъэм гъэзетхэм ыкIи телекъэтынхэм зэпыу ямыIэу къыдэкIыгъэх. Илъэсыбэ хъу­гъэу Iоф зышIэрэ журналистхэм, гъэзетым ыкIи къэбархэм якъыдэкIын Iоф дэзышIэхэрэм, джащ фэдэу шъолъырым щагъэцэкIэрэ лъэпкъ проектхэм, Хэ­гъэгу зэошхом текIоныгъэ къызыщыдахыгъэр илъэс 75-рэ зэрэхъу­гъэм ихэгъэунэфыкIын ыкIи цIыфхэр вакцинацие зэрашIыхэрэр къыхэзыутыхэрэм сирэзэныгъэ гущыIэхэр афэсэгъазэ, — къыIуагъ комитетым итхьаматэу Шъхьэлэхъо Аскэр.

Джащ фэдэу ащ къызэриIуагъэмкIэ, Урысыем и Президентэу Владимир Путиным къыгъэуцугъэ пшъэрылъхэр республикэм чанэу щагъэцакIэх. Лъэпкъ проектхэм, шъолъырым хэхъоныгъэ ышIыным фытегъэпсыхьэгъэ хэушъхьафыкIыгъэ программэхэм алъэныкъокIэ бэ ашIэрэр. Мыхэм афэгъэхьыгъэ къэбархэр СМИ-хэм къызэрэхаутыхэрэ шIыкIэм елъытыгъ республикэм общественнэ ыкIи социальнэ зыпкъитыны­гъэу илъыр зыфэдэщтыр.

Щытхъу тхылъ къыфагъэшъошагъ тиIофшIэгъоу «Адыгэ макъэм» икорректорэу Гъогъо Зарэ. Илъэсыбэ хъугъэу Зарэ IэпэIэсэныгъэшхо хэлъэу иIофшIэн егъэцакIэ. Зыфэгъэзэгъэ лъэныкъом хэшIыкIышхо фыриI, бэхэм упчIэжьэгъу ашIы, ежьми игуапэу хэти IэпыIэгъу фэхъу. Къыратыгъэ щытхъу тхылъыр къылэжьыгъэ шъыпкъэу щыт.

Джащ фэдэу къыхагъэщыгъэх редакциеу «Советскэ Адыгеим» иобозревателэу Надежда Шрам, Адыгэ республикэ тхылъ тедзапIэм иредакторэу ЖакIэмыкъо Светланэ, кIэлэцIыкIу журналэу «Родничок» зыфиIорэм иредакторэу Бэгъушъэ Марыет, гъэзетхэу «Красное знамя» зыфиIорэм икорреспондентэу Къыкъ Саидэ, «Единствэм» культурэмрэ спортымрэкIэ иотдел иредакторэу Тыркоо Мурат, «Майкопские новости» зыфиIорэм иIофышIэхэу Виктория Рудниченкэр ыкIи Лариса Поповар, «Дружбэм» иIофышIэу Ксения Овчинниковар, «Маякым» рек­ламэмкIэ иотдел ипащэу Юлия Бобраковар, «Зарям» иредактор шъхьаIэу Ашъхьэмэфэ Жаннэ, район телевидениеу «Зарям» иIофышIэу Сихъу Бэллэ, «Согласием» иредактор шъхьаIэу Меда Болетовар, «Кошехабльские вести» зыфи­Iорэм иобозревателэу ЕмыкI Аллэ, «Теу­чежские вести» иредактор шъхьаIэу Хьакъуй Юрэ ыкIи Кощхьаблэ дэт къэбарлъыгъэIэс гупчэм иредактор шъхьаIэ игуадзэу Хъупсарыкъо Нэфсэт.

Ащ нэмыкIэу Хэгъэгу зэошхом текIоныгъэр къызыщыдахыгъэр илъэс 75-рэ зэрэхъугъэм фэгъэхьыгъэ тхыгъэхэр къызыгъэхьазырыгъэхэм шIэжьым ыкIи щытхъум я Илъэсэу агъэнэфагъэм» игъэцэкIэкIо дирекцие ирэзэныгъэ тхылъхэр ратыжьыгъэх. Ахэр «Адыгэ макъэм» иIофышIэу Мамрыкъо Нуриет, ГТРК «Адыгеям» икорреспондентэу Татьяна Беловар, «Мыекъопэ телевидением» икорреспондентэу Светлана Абакумовар, гъэзетэу «Единствэм» иредактор шъхьа­Iэ игуадзэу Кушъу Аслъан, нэмыкIхэри.

КIАРЭ Фатим.