Олимпиадэ джэгунхэу Японием щыкIощтхэм ахэлэжьэщтхэм загъэхьазыры.

Урысыем гандболымкIэ ихэшыпыкIыгъэ бзылъфыгъэ командэ 2016-рэ илъэсым Олимпиадэм дышъэр къыщихьыгъ. Зичэзыу Олимпиадэм дэгъоу хэлэжьэным фэшI пэшIорыгъэшъ Iофтхьабзэхэр спортымкIэ пащэхэм зэхащэх.

Европэм изэнэкъокъоу бэмы­шIэу щыIагъэм Урысыем иешIа­кIохэм я 5-рэ чIыпIэр къыщыдахыгъ. Ащ уезэгъы мыхъущтэу зэхахьэм къыщаIуагъ. Тренер шъхьаIэу щытыгъэ А. Мартиныр иIэнатIэ IуагъэкIыгъ.

Хэгъэгум гандболымкIэ и Федерацие унашъоу щаштагъэм къыщеIо Алексей Алексеевыр Урысыем гандболымкIэ ихэшыпыкIыгъэ командэ итренер шъхьа­Iэу зэрагъэнэфагъэр.

Алексей Алексеевыр «Лада» Тольятти итренер шъхьаI, хэгъэ­гум гандболымкIэ ихэшыпыкIыгъэ бзылъфыгъэ командэ итренер шъхьаIэ игуадзэу щытыгъ.

Спортышхом щызэлъашIэрэ Евгений Трефиловыр тренер шъхьаIэм иупчIэжьэгъоу агъэнэфагъ. Е. Трефиловым Мыекъопэ «АГУ-Адыифым» итренерэу Iоф ышIэщтыгъ, хэгъэгум ихэшыпыкIыгъэ командэ итренер шъхьаIэу тиешIакIохэм Олимпиадэм ды­шъэр къыщахьыгъ.

Мыекъуапэ игандбол клубэу «Адыифым» щагъэсэгъэ Виктория Калининар Урысыем ихэшыпыкIыгъэ гандбол командэ хэт, Олимпиадэм дышъэр къыщи­хьыгъ, къэлэпчъэIутэу ар ешIэ. Джырэ уахътэ Урысыем икомандэ анахь лъэшэу «Ростов-Доным» хэт.

— Адыгеир сэ сигупс, Мые­къуапэ сыщапIугъ, Евгений Поповыр сиапэрэ тренер, — къытиIуагъ Виктория Калининам. – Олимпиадэ джэгунхэм сахэлэжьэнэу зысэгъэхьазыры.

Виктория Калининам имурадхэр къыдэхъунхэу, идышъэ медальхэм ахигъэхъонэу фэтэIо.

Алексей Алексеевым къызэриIуагъэу, Бразилием щыкIогъэ Олимпиадэ джэгунхэм тиешIа­кIохэм дышъэр къызэрэщахьыгъэр тарихъым хэхьагъ, щытхъу­цIэр гъашIэм хэкIокIэщтэп. Гъэ­хъагъэу яIэм хагъэхъоныр тиешIакIохэм, тренерхэм япшъэ­рылъ шъхьаIэу алъытэ.