Л. Месси анахь дэгъу
Дунаим футболымкIэ тарихъымрэ статистикэмрэ я Федерацие зэфэхьысыжьхэр ышIыгъэх.
Аужырэ илъэси 10-м дунаим ифутбол ешIэкIо анахь дэгъур къыхэхыгъэнымкIэ зэгъэпшэнхэм хъугъэ-шIэгъэ гъэшIэгъонхэр къахагъэщыгъэх.
Аргентинэм ихэшыпыкIыгъэ футбол командэ хэтэу, Испанием иклубэу «Барселонэм» щешIэрэ Лионель Месси ешIэкIо анахь дэгъоу къыхахыгъ, апэрэ чIыпIэр фагъэшъошагъ.
Дунэе шIухьафтынэу «Дышъэ Iэгуаор» Л. Месси гъогогъуи 6 ратыгъ. «Барселонэм» хэтэу гъогогъуи 6 Испанием дышъэ медалыр къыщыдихыгъ, хэгъэгум и Кубок къыхьыгъ.
Португалием щыщэу Италием иклубэу «Ювентусым» щешIэрэ Криштиану Роналду ятIонэрэ чIыпIэр фагъэшъошагъ.
Адыгеим икIэлэцIыкIухэм яфутбол майкэхэм Месси, Роналду, фэшъхьафхэр атетхагъэхэу бэрэ тэлъэгъух. Дунаим щыцIэрыIо ешIакIохэр кIэлэеджакIохэм ашIогъэшIэгъоных, щысэ атырахы.
— Дунэе щытхъуцIэхэр къызэрэсфаусыхэрэм сегъэгушхо, ащ фэдэ хъугъэ-шIагъэхэм мэхьэнэ ин яIэу сэлъытэ, — къыIуагъ Лионель Месси.