ЗэIукIэгъу зэдыряIагъ
Адыгеим и ЛIышъхьэу КъумпIыл Муратрэ кIэлэцIыкIум ифитыныгъэхэмкIэ Уполномоченнэу Адыгэ Республикэм щыIэ Александр Ивашинымрэ тыгъуасэ зызэIокIэхэм Уполномоченнэм иаппарат гъэрекIо Iоф зэришIагъэм тегущыIагъэх.
ЗэIукIэгъум хэлэжьагъэх Адыгэ Республикэм ивице-премьерэу Наталья Широковар, Адыгеим IофшIэнымрэ социальнэ хэхъоныгъэмрэкIэ иминистрэу Мырзэ Джанбэч, республикэм гъэсэныгъэмрэ шIэныгъэмрэкIэ иминистрэ иапэрэ гуадзэу Евгений Лебедевыр.
ЗэIукIэгъур къызэIуихызэ, кIэлэцIыкIухэм яфитыныгъэхэмрэ яфедэхэмрэ якъэухъумэнкIэ Iофхэр нахьышIоу зэрэзэхащэн фаер республикэм и ЛIышъхьэ къыхигъэщыгъ.
«Зэщыгъэкъон Iофхэм Iэтахъохэр непэ ахащэнхэ зэралъэкIыщтыр нэрылъэгъу къытфэхъугъ. Ащ фэдэ Iофыгъохэм игъом анаIэ атырадзэным, ны-тыхэмрэ кIэлэцIыкIухэмрэ адэгущыIэнхэм мэхьанэшхо яI», — хигъэунэфыкIыгъ КъумпIыл Мурат.
2020-рэ илъэсым Iоф зэрашIагъэм къытегущыIэзэ, Александр Ивашиным къыIуагъ Уполномоченнэм иаппарат тхылъ 205-мэ зэрахэплъагъэр. Сабыйхэм жъалымэу зэрадэзекIохэрэмкIэ, гъэсэныгъэ ыгъотынымкIэ кIэлэцIыкIум фитыныгъэу иIэхэр къызэрэдалъытэрэмкIэ, сабый ибэхэмрэ ны-тыхэр зышъхьарымытыжь кIэлэцIыкIухэмрэ яфитыныгъэхэм якъэухъумэнкIэ, ны-тыхэм япшъэрылъхэр зэрамыгъэцакIэхэрэмкIэ тхьаусыхэ тхылъхэу къаIэкIахьэрэр нахь макIэ хъугъэ.
ПравэмкIэ кIэлэцIыкIухэм шIэныгъэ ягъэгъотыгъэнымкIэ, кIэлэеджакIохэм я Урысые движение ишъолъыр къутамэ зэпхыныгъэ дыряIэнымкIэ Iофышхо зэрашIагъэр Александр Ивашиным къыIуагъ. КIэлэцIыкIум ифитыныгъэхэмкIэ Уполномоченнэу Адыгэ Республикэм щыIэм къепхыгъэ кIэлэцIыкIу общественнэ советми онлайн шIыкIэм тетэу Iоф ышIагъ.
ЦIыфхэм ятхьаусыхэ тхылъхэм икъоу ахэплъэнхэм, амал зэриIэкIэ ахэм ялъэIухэр афэгъэцэкIэгъэнхэм мэхьанэшхо зэриIэр республикэм и ЛIышъхьэу КъумпIыл Мурат къыхигъэщыгъ. МыщкIэ лъэшэу ишIуагъэ къэкIо Уполномоченнэм хэбзэ къулыкъухэм, прокуратурэм, чIыпIэ зыгъэIорышIэжьынымкIэ къулыкъухэм, общественнэ организациехэм зэдэлэжьэныгъэу адыриIэр гъэлъэшыгъэным ынаIэ зэрэтыригъэтырэм.
Адыгэ Республикэм и ЛIышъхьэ ипресс-къулыкъу