Зэфэхьысыжьхэм атегущыIагъэх
Адыгеим и ЛIышъхьэу КъумпIыл Муратрэ Урысые общественнэ шIушIэ фондэу «Урысые кIэлэцIыкIу фондым» и Адыгэ республикэ къутамэ иправление итхьаматэу Татьяна Гоголевамрэ тыгъуасэ зызэIокIэхэм зигугъу къэтшIыгъэ организацием гъэрекIо Iоф зэришIагъэм тегущыIагъэх.
Джащ фэдэу зэIукIэгъум хэлэжьагъэх Адыгеим ивице-премьерэу Наталья Широковамрэ республикэм гъэсэныгъэмрэ шIэныгъэмрэкIэ иминистрэ иапэрэ гуадзэу Евгений Лебедевымрэ.
Фондым ишъолъыр къутамэ ипащэ къызэриIуагъэмкIэ, коронавирусым гъэрекIо зыкъызэриштагъэм къыхэкIэу рахъухьэгъэгъэ Iофтхьэбзабэ зэкIахьажьын фаеу хъугъэ. Ау республикэм ихэбзэ къулыкъухэм ягъусэу организацием фызэшIокIыгъ Адыгеим икIэлэеджакIохэр Урысые зэнэкъокъум хигъэлэжьэнхэу. Джащ фэдэу шъолъыр программэу «IэкIыб къэралыгъуабзэр зэгъашI» зыфиIоу сэкъатныгъэ зиIэ сабыйхэр, унэгъо Iужъухэм, гъот макIэ зиIэ унагъохэм арыс кIэлэцIыкIухэр зыхэлэжьагъэр онлайн шIыкIэм тетэу пхыращыгъ.
Волонтерхэр къадеIэхэзэ зипсауныгъэкIэ щыкIагъэ зиIэ кIэлэцIыкIухэм апае илъэсыкIэ шIухьафтынхэр аугъоигъэх. 2020-рэ илъэсым ичъэпыогъу Фондым ишъолъыр къутамэ общественнэ-къэралыгъо фондыкIэу «КIэлэцIыкIухэм якъэухъумэн фэгъэзэгъэ Фондэу» Урысыем и Президент и УказкIэ зэхащагъэм хэхьагъ.
Урысые кIэлэцIыкIу фондым пхырищырэ социальнэ ыкIи нэмыкI проектхэм мэхьанэшхо зэряIэр республикэм и ЛIышъхьэ хигъэунэфыкIыгъ.
«Коронавирусым зыкъызэриштагъэм епхыгъэу ишъухъухьэгъэгъэ Iофтхьабзэхэм ащыщхэр зэрэшъуфэмыгъэцэкIагъэр къыдгурэIо. Ау амал зэриIэкIэ кIэлэцIыкIухэр нахьыбэу шъуипроектхэм къахэлэжьэнхэм шъупылъын фае. Хэбзэ къулыкъухэм япшъэрылъ шъхьаIэр социальнэ, культурэ инфраструктурэм зегъэушъомбгъугъэныр ары. Джыдэдэм республикэм чанэу культурэмкIэ унэхэр, цIыфхэм япсауныгъэ зыщагъэпытэрэ физкультурэ комплексхэр щагъэпсых, библиотекэхэр щагъэцэкIэжьых, къыткIэхъухьэрэ ныбжьыкIэхэм яамалхэм зыкъызэIуягъэхыгъэнымкIэ ищыкIагъэр щашIэ. МыщкIэ зэкIэми тIэ зэкIэдзагъэу тызэдэлэжьэн фае», — къыIуагъ КъумпIыл Мурат.
ЗэIукIэгъум икIэух Адыгеим и ЛIышъхьэ пшъэрылъ афишIыгъ федеральнэ грантхэм ахэлэжьэнхэмкIэ Урысые кIэлэцIыкIу фондым ишъолъыр къутамэ IэпыIэгъу фэхъунхэу. Гъот макIэ зиIэ унагъохэм арыс кIэлэцIыкIухэу унэе спорт секциехэм, творческэ кружокхэм кIо зышIоигъохэм IэпыIэгъу аратын зэрэфаер ащ хигъэунэфыкIыгъ.
Адыгэ Республикэм и ЛIышъхьэ ипресс-къулыкъу