Ростов-на-Дону щыпсэурэ тилъэпкъэгъухэм нэIуасэ шъуафэтшIыныр лъытэгъэкIуатэ. Непэ зигугъу къэтшIыщт бзылъфыгъэм пшъэрылъэу зыфигъэуцужьырэр къыздигъэхъун елъэкIы, шIушIэным ищыIэныгъэ гъогу рипхыгъэу мэпсэу.

Светлана Комиссаровар шIушIэ фондэу «Счастливая семья — процветающее Отечество» зыфиIорэм ипащ. Илъэс зэкIэлъыкIохэм IэпыIэгъу зищыкIэгъэ сабыйхэм «ыIэ афещэи», ыгу зэIухыгъэу ягумэкIыгъохэр адегощы.

Адыгеим щызэлъашIэрэ къо­джэ зэ­кIужьэу Бжыхьэкъоежъым Светланэ къыщыхъугъ. Къэлэкъу­тэкъо лIакъом ар къыхэхъу­хьагъ. 1967-рэ илъэсым гурыт еджапIэр дышъэ медалькIэ къыухыгъ ыкIи ащ къыщымыуцоу ишIэныгъэхэм ахигъэ­хъоным фэшI къэлэшхом зигъэзагъ. Ростов къэралыгъо университетым филологиемкIэ ифакультет чIэхьагъ. Апшъэ­рэ гъэсэныгъэр зэригъэгъотыгъ ыкIи сэнэхьатэу къыхихыгъэм илъэсыбэрэ рылэжьагъ. Нэужым шIушIэным зыфи­гъэзагъ ыкIи ащ ищыIэныгъэ гъогу рипхыгъ. 2006-рэ илъэсым къыщегъэжьагъэу шIушIэ фондэу «Счастливая семья — процветающее Отечество» зыфиIорэм ипащэу Iоф ешIэ.

— Мы фондыр кIэлэцIыкIу сымэджэщым ионкогематологическэ гупчэ чIэлъхэм нахьыбэрэмкIэ IэпыIэгъу афэхъу. Ахэм апае илъэс къэс мэфэкI Iоф­тхьабзэхэр зэхэтэщэх, операцие хьылъэ зищыкIагъэхэм ахъщэ афэтэугъои, — къеIуатэ Светланэ. — ТиIофшIэн программэ зэфэшъхьафхэмкIэ зэ­хэтэщэ, пшъэрылъ шъхьаIэу тиIэр унагъом иинститут гъэпытэгъэныр, сабыйхэм патриотизмэр ахэлъэу гъэсэгъэнхэр ары. Мыщ фэIорышIэрэ проектхэри тиIэх. ГущыIэм пае, «Парад детских войск» зыфиIорэр. Ащ фэдэ Iофтхьабзэ къэралыгъоми ду­наими ащызэхащэрэп. Гухэлъ шъхьаIэу проектым щыпхырыщыгъэр сабый цIыкIум ихэгъэгу шIу ылъэгъоу, итарихъ, икультурэ ыгъэлъапIэхэу къэтэджыным фэгъэсэгъэ­ныр ары. ДжэгукIэ шъуашэм илъэу ар тэгъэпсы.

Джащ фэдэу унагъом зэгурыIоныгъэр зэрилъапсэр зыпхырыщыгъэ, шIушIэным цIыфхэр къыфэзыгъэущырэ Iофтхьабзэхэр фондым зэхещэх, ахэм нахьыбэ къахагъэлэжьэным пылъых.

ТигущыIэгъу иунагъо нахь игъэкIотыгъэу зыкъыфэдгъэзэжьын. 1971-рэ илъэ­сым Светланэ унагъо ихьагъ. Ишъхьэгъу­сэу Виталий Ростов къэралыгъо университетыр къыухыгъ ыкIи непэрэ мафэм нэс ащ щэлажьэ. Зэшъхьэгъусэхэм 1976-рэ илъэ­сым пшъэшъэ цIыкIу къафэ­хъугъ. Иринэ янэ-ятэхэм ягъогу кIырыплъызэ зыщеджэщт университетыр къыхи­хыгъ. ЫпэкIэ зигугъу къэтшIыгъэ РКъУ-м психологиемкIэ ифакультет ще­джагъ. Ащ нэмыкIэу юридическэ факультет­ри пшъэ­шъэ ныбжьыкIэм къы­ухыгъ. Илъэс 17 хъугъэу очылэу Иринэ Iоф ешIэ.

ТигущыIэгъурэ ишъхьэгъусэрэ унэгъо зэгурыIожь зэрагъэпсыщтым пылъыгъэх, ащ мэхьанэу иIэр къагурыIоу шъхьэкIэфэныгъэрэ гукIэгъуныгъэрэ зэфыряIэу зэдэпсэух. Ны-тыхэм язэфыщытыкIэ ищысэтехыпIэу Иринэ къэхъугъ ыкIи ежь иунагъо ышIагъ.

Светланэрэ ишъхьэгъусэрэ япхъорэлъф агъашIо. Алинэ джырэ уахътэ Ростов къэралыгъо медицинэ университетым щеджэ. Уахътэ иIэ зэрэхъоу ныжъ-тыжъхэм акIэрыс, ахэм къыфаIотэрэ къэбархэр, щыIэныгъэм къыхэхыгъэ пычыгъохэм икIасэу ядэIу.

— Ростов сыкъызэкIом адыгэу дэсыгъэр мэкIагъэ, — игукъэ­кIыжьхэмкIэ къыддэгуащэ Светланэ. — Ау силъэпкъэ­гъухэр зэзгъэшIэнхэм, ахэм заIузгъэкIэным сыпылъыгъ. Джырэ уахътэм нэс тызэщыгъупшагъэп, тызэкъо­тэу тэпсэу.

ТигущыIэгъу ипшъашъэ ицIыкIугъом адыгабзэ зэрэIуилъхьащтым пылъыгъ. Ащ адыгэ усэ цIыкIухэр, лъытакIэ ригъа­шIэ­щтыгъэ. Светланэ зыщыщ къуа­джэми пшъэшъэ цIыкIур бэрэ кIощтыгъэ, ащ ишIуагъэкIэ Иринэ адыгабзэр дэгъоу къыгурэIо.

Светланэ щыIэныгъэ гъогу гъэшIэгъон къыкIугъ. Ар шIушIэным, гукIэгъуныгъэм изехьакIоу щыт, джыри IэпыIэгъу цIыфхэм зэрафэхъущтым пылъ. Ащ зэрилъытэрэмкIэ, шIушIэныр цIыфым ежь ыгу къыщежьэ. Ыгу зэIухыгъэу, гушIуагъор зиIэубытыпIэу щымытым цIыфхэм ар адигощын ылъэкIыщтэп. ГукIэгъу­ныгъэм шIулъэгъуныгъэр къыщежьэ.

Абрэдж Сэтэнай.