Iофтхьабзэр рагъэжьагъ

Интернетыр щынэгъончъэным и Ду­нэе мафэ къыдыхэлъытагъэу Урысые Iофтхьабзэу «Узнай о своих долгах» зыфиIорэр Адыгеим щырагъэжьагъ. ЦIыфым чIыфэу телъым фэгъэхьыгъэ къэбар шъыпкъэр псынкIэу къыIэкIэхьаным ар фытегъэпсыхьагъ.

Iофтхьабзэр окIофэ республикэм ихьыкум приставхэр цIыфхэм аIукIэщтых, чIыпIэ къин имыфэнхэм фэшI къэбарлъыгъэIэс щынэгъончъэным ылъэныкъокIэ щыIэ шапхъэхэр къафаIотэщтых.

ЧIыфэ шъутелъымэ зэжъугъэшIэным, Iоф къышъуфызэIуахыгъэмэ ар зэрэзэхафырэм, ащ фэгъэзэгъэ хьыкум пристав-гъэцэкIакIом, ащ ителефон номер, нэмыкIхэм защыжъугъэгъозэным афэшI амал зэфэшъхьафхэр къызфэжъугъэфедэнхэ зэрэшъулъэкIыщтыр шъугу къегъэкIыжьы хьыкум приставхэм я Федеральнэ къулыкъу Адыгэ РеспубликэмкIэ и ГъэIорышIапIэ.

ГущыIэм пае, ГъэIорышIапIэм исайтэу r01.fssp.gov.ru илъэныкъоу «Банк данных исполнительных производств» зыфиIорэм шъуищыкIэгъэ къэбарыр ижъугъо­тэщт. Джащ фэдэу къэралыгъо фэIо-фашIэхэм языкI портал шъуихьэу, Iофэу къышъуфызэIуахыгъэм иномер зишъутхэкIэ чIыфэр зыфэдизыр къышъуфыритхэщт. Мобильнэ пкъыгъохэм яприложениеу «ФССП-р» къыз­фэжъугъэфедэн шъулъэкIыщт. Ащ нэмыкIэу хьыкум приставхэм къулыкъу зыщахьырэ чIыпIэхэм шъуякIуалIэмэ ахэр IэпыIэгъу къышъуфэхъущтых, чыжьэу шъумыкIоу мыхэм ачIэт хэушъхьэфыкIыгъэ терминалхэмкIэ чIыфэр шъупщынын шъулъэкIыщт.

ЧIыфэр къы­пщыныжьыгъ

Тэхъутэмыкъое районым щыпсэурэ хъулъфыгъэм кIэлэпIупкIэр игъом зэримытырэм къыхэкIэу административнэ пшъэдэкIыжь рагъэхьыгъ, ащ ыуж ары чIыфэр къызипщыныжьыгъэр.

Хъулъфыгъэм ипшъэрылъхэр зэримыгъэцакIэхэрэм къыхэкIыкIэ чIыфэу сомэ мини 100-м ехъу зэIуигъэ­кIагъ, зыныбжь имыкъугъэ исабый ар фызэкIигъэ­кIожьын фэягъ.

Хьыкумыр мы Iофым хэплъагъ, хъулъфыгъэм административнэ хэбзэукъоныгъэ зэрэзэрихьагъэм дыригъэштагъ ыкIи сыхьат 80-м телъытэгъэ шIокI зимыIэ IофшIэнхэр ыгъэцэкIэнхэу пшъэдэкIыжь тырилъхьагъ.

Ащ ыуж чIыфэу телъыгъэр зэкIэ хъулъфыгъэм къы­пщыныгъ, ащкIэ Iофыр зэфэшIыжьыгъэ хъугъэ.

Хьыкум приставхэм я Федеральнэ къулыкъу Адыгэ РеспубликэмкIэ и ГъэIорышIапIэ ипресс-къулыкъу.