Пыдзэфэ пытэхэм ядэщын фэгъэзэгъэ шъолъыр операторым итранспортнэ-техническэ къулыкъу иIофышIэхэу тынхэмкIэ къыхагъэщыгъэхэм джырэблагъэ ахэр аратыжьыгъэх.

Зэпахырэ узэу дунаир зэлъызыкIугъэр къызежьагъэм къыщыублагъэу ахэр апэ итхэм ащыщых, зыпарэкIи яIофшIэн къагъэу­цугъэп, зэрэгъэнэфагъэм тетэу хэкIыр Iуащы. Ащ фэдэу пыдзафэхэм узэрадэзекIощтым ылъэны­къокIэ системэм зэхъо­кIыныгъэу фэхъугъэхэм япхырыщын иIахь мымакIэу зэрэхилъхьэрэм, ипшъэрылъхэр хэзыгъэ имыIэу зэригъэцакIэхэрэм афэшI УФ-м чIыопсым икъэкIуапIэхэмкIэ ыкIи экологиемкIэ и Министерствэ ирэзэныгъэ тхылъ къыфагъэшъошагъ хэкIыр зэрэIуащырэ автомаши­нэхэм ащыщ иводителэу Сергей Задориным.

Ащ нэмыкIэу нэбгыри­пшIымэ коронавирусым зызщиушъомбгъурэ лъэ­хъаным ащ къымыгъащтэхэу республикэм икъэ­бзэныгъэ анаIэ зэрэтырагъэтырэм фэшI «ЭкоЦентрэм» ирэзэныгъэ тхылъхэр афагъэшъошагъэх.

АР-м псэолъэшIынымкIэ, транспортымкIэ, псэу­пIэ-коммунальнэ ыкIи гъо­гу хъызмэтымкIэ и Ми­­нистерствэ псэупIэком­мунальнэ хъызмэтым­кIэ и ГъэIорышIапIэ ипащэу Ныбэ Руслъан зиIоф­шIагъэ къыхагъэщыгъэ­хэм къафэгушIуагъ, ахэм зэра­фэразэхэр къы­хи­гъэщыгъ. Зэпахырэ узым зызэ­риушъомб­гъу­рэм ыпкъ къикIыкIэ на­хьыбэу атегъэуагъэ хъугъэ нахь мы­шIэми, яIофшIэн къызэ­рэщамы­гъэкIагъэм, пшъэ­рылъэу яIэхэр икъоу зэрагъэцэкIагъэхэм къы­кIи­гъэт­хъыгъ.