Щынэгъончъэным фэIорышIэщт
2021-рэ илъэсым гъогурыкIоныр щынэгъончъэным епхыгъэ Iофыгъохэм зыщатегущыIэгъэхэ зэхэсыгъо гъогурыкIоныр щынэгъончъэнымкIэ къэралыгъо автоинспекцием и ГъэIорышIапIэу АР-м щыIэм щыкIуагъ.
Ащ хэлэжьагъэх Адыгэ Республикэм псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэ иапэрэ гуадзэу Лафышъэ Рэмэзан, ФКУ-у «Федеральнэ автомобиль гъогухэм я ГъэIорышIапIэу «Черноморье» зыфиIорэм», Тэхъутэмыкъое район администрацием ялIыкIохэр ыкIи «Адыгеяавтодорым» ипащэ.
Адыгеим пхырыкIырэ федеральнэ гъогухэм щынэгъончъэныр ащыгъэпытэгъэным, транспорт хъугъэ-шIагъэхэм ахэкIуадэхэрэм ыкIи фыкъоныгъэу хахыхэрэм япчъагъэ нахь макIэ шIыгъэным епхыгъэ Iофыгъохэм, джащ фэдэу мы гъогушхохэм сурэт ыкIи видео атезыхырэ пкъыгъохэр зэратырагъэуцощтхэм атегущыIагъэх.
Адыгеим и Къэралыгъо автоинспекцие ипащэу, полицием иполковникэу Александр Курпас тишъолъыркIэ гъогу хъугъэ-шIагъэхэм язытет къытегущыIагъ. ГъогурыкIоныр щынэгъончъэным фэIорышIэщт программэхэу 2021-рэ илъэсым аштэщтхэм авариехэр нахь макIэ шIыгъэнхэмкIэ къыдыхэлъытэгъэн фэе лъэныкъоу агъэнэфагъэхэм инспектор шъхьаIэр къащыуцугъ. Ахэр гъогум ращэрэ гъэтхъыгъэхэм язытет шэпхъэшIухэм адиштэныр, зыдагъэзэщт лъэныкъор къэзыгъэлъэгъорэ пкъыгъохэр пкъэухэм апылъэгъэнхэр, анахьэу хъугъэ-шIагъэхэр зыщыхъурэ чIыпIэхэм гъожь-уцышъо нэфынэр къэзытырэ гъогу тамыгъэхэр, автомобильхэр бэу зыщызечъэрэ гъогухэм ялъэсрыкIо зэпырыкIыпIэхэм нэфрыгъуазэхэр ащыгъэуцугъэнхэр, машинабэ зэрыкIорэ гъогухэр гъучI пкъэухэмкIэ къэшIыхьэгъэнхэр, нэмыкIхэри.
2020-рэ илъэсым изэфэхьысыжьхэм адиштэу гъогу хъугъэ-шIагъэхэр нахьыбэу къызщыхъугъэ чIыпIэхэр зэхэсыгъом щагъэнэфагъэх. Ахэм япхыгъэ Iофыгъохэу дагъэзыжьыщтхэм анаIэ тырадзагъ.