Республикэм икъэлэ шъхьаIэ дэт кIэлэцIыкIу джэгупIэ гупчэхэм ащыщ Къэралыгъо автоинспекторхэр щыIагъэх. Ащ къыщызэрэугъоигъэ ны-тыхэм сабыйхэр автомобилымкIэ къызэрэращэкIыхэрэм епхыгъэ шапхъэхэр къафаIотагъэх.

ПэшIорыгъэшъ зэдэгущыIэгъум анахьэу анаIэ зытырагъэты­гъэр хэушъхьафыкIыгъэ кIэлэцIыкIу тIысыпIэхэр ыкIи щынэгъончъэ бгырыпхыр зэрагъэфедэнхэ фаер ары.

Ащ дакIоу, ежьхэр сабыйхэм щысэшIу афэхъунхэмкIэ ны-тыхэми щынэгъончъэ бгырыпхыр зэрагъэфедэнэу щытыр агу къагъэ­кIыжьыгъ. Гъогум ыкIи ом язытет елъытыгъэу игъом ыкIи щынэгъончъэу къэуцужьышъунхэм фэшI ищыкIэгъэ скоростыр къыхахынэу ара­Iуагъ. Iофтхьабзэм хэлэжьагъэхэм хэушъхьафыкIыгъэ кIэлэцIыкIу тIысыпIэхэм ягъэфедэн мэхьанэу иIэр зэрытхэгъэ гукъэкIыжь тхьапэхэр афагощыгъэх.