Адыгеим и Къэралыгъо автоинспекторхэр полицейскэ классым щеджэхэрэм бэмышIэу заIуагъэкIагъ. ГъогурыкIоным ишапхъэхэр гъэцэкIэгъэнхэм мэхьанэу иIэр ахэм къафаIотагъ.

ГъогурыкIоныр щынэгъончъэнымкIэ къэралыгъо инспекцием и ГъэIорышIапIэу АР-м щыIэм иIофышIэу, полицием имайорэу Дмитрий Куликовым я 11-рэ полицейскэ классым щеджэхэрэр инспекцием иIофшIэн зыфэгъэзэгъэ лъэныкъохэм, водительхэм зэрахьэрэ хэбзэукъоныгъэхэр къызэрэхагъэщыхэрэ шIыкIэхэм нэIуасэ афишIыгъэх.

Джащ фэдэу аварие къызщыхъугъэ чIыпIэм гъогу-патруль къулыкъум иIофшIэн зэрэщызэхищэрэр ыкIи нэмыкI къулыкъу­хэм ялIыкIохэм зэпхыныгъэу адыриIэр кIэлэеджа­кIохэм къафиIотагъ.

НыбжьыкIэхэм ягъогу щынэгъончъэу щытыным фэIорышIэрэ зэдэгущыIэгъуи адашIыгъ. Анахьэу зэпырыкIыпIэхэм са­къыныгъэ къызщахагъэфэнэу араIуагъ. Скутерхэр ыкIи мопедхэр агъэIорышIэхэ зыхъукIэ хэушъхьафыкIыгъэ шъуашэхэр зыщалъэнхэу зэрэщытыр агу къагъэкIыжьыгъ.

ЗэIукIэгъум икIэух апшъэрэ классым исхэр зыгъэгумэкIырэ упчIэхэм яджэуапхэр Дмитрий Куликовым къыритыжьыгъэх.