СтIашъу Мамыр итыжьын
Тыркуем икъалэу Газипашэ кушъхьэфэчъэ спортымкIэ дунэе зэIукIэгъухэр щыкIуагъэх.
Адыгэ Республикэм ихэшыпыкIыгъэ командэ хэтэу, спортымкIэ дунэе класс зиIэ мастерэу СтIашъу Мамыр зэнэкъокъум хэлэжьагъ.
Километри 157-рэ хъурэ мыжъо гъогум спортсменхэм яIэпэIэсэныгъэ къыщагъэлъэгъуагъ. Италием, Беларусым, Украинэм, Мексикэм, Францием, Урысыем, Тыркуем, фэшъхьафхэм къарыкIыгъэхэр зэнэкъокъугъэх.
СтIашъу Мамыр икъулайкIи купышхом хэтэу шIыкIэшIухэр зэригъэфедэрэмкIи къахэщыгъ, ятIонэрэ чIыпIэр къыдихыгъ.
— Урысыем кушъхьэфэчъэ спортымкIэ изэнэкъокъу мэкъуогъум Санкт-Петербург щызэхащэщт, — къытиIуагъ Адыгеим кушъхьэфэчъэ спортымкIэ и Федерацие ипащэу Анатолий Лелюк. — Республикэм ихэшыпыкIыгъэ командэ Тыркуем щыIэу зэIукIэгъухэм зафегъэхьазыры. Егъэджэн-уплъэкIун Iофтхьабзэхэм Александ Евтушенкэр, СтIашъу Мамыр, Елизавета Ошурковар, нэмыкIхэри чанэу ахэлажьэх.
Тыркуем щыкIогъэ зэнэкъокъум хэлэжьагъэхэр.