Мыекъуапэ иинженернэ псэуалъэхэм язытет зыщигъэгъозагъ
УФ-м и Премьер-министрэу Михаил Мишустиныр Адыгеим къызэкIом игъусагъэхэм ащыщ УФ-м псэолъэшIынымкIэ ыкIи псэупIэ-коммунальнэ хъызмэтымкIэ иминистрэу Ирек Файзуллиныр. Ар мы мафэм псыр зэрагъэкъэбзэрэ псэуалъэхэу (очистные сооружения) Мыекъуапэ щагъэкIэжьыхэрэм яплъыгъ.
Министерствэу ар зипащэр IэпыIэгъу къафэхъуи 2019-рэ илъэсым икъихьагъум псэуалъэхэр икIэрыкIэу ашIыжьынхэу рагъэжьагъ. Ащ пае сомэ миллиардрэ миллион 274-рэ къатIупщыгъ. Проектым къыдыхэлъытагъэхэм ягъэцэкIэн АР-м и ЛIышъхьэу КъумпIыл Мурат ежь ышъхьэкIэ ынаIэ тет.
АР-м и Премьер-министрэ игуадзэу Сапый Вячеславрэ псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ министрэу Валерий Картамышевымрэ IофшIэнхэр зэрэлъыкIуатэхэрэм федеральнэ министрэр къыщагъэгъозагъ.
ПсыукъэбзыпIэр чэщ-зымафэм псы кубометрэ мини 116-рэ агъэкъэбзэным фытегъэпсыхьэгъэ линиитIоу зэхэт. АР-м псэолъэшIынымкIэ иминистрэ къызэриIуагъэмкIэ, псэупIэу къалэм иIэм илъэс къэс квадратнэ метрэ мин 50-м нэсэу хагъэхъонэу гухэлъ яI, ащ фэшI псэуалъэм ыкIуачIи нахьыбэ шIыгъэн фае. Проектым къызэрэщыдэлъытагъэм тетэу ар зэрэщытэу агъэкIэжьыщт. Ащ нэмыкIэу зым кубометрэ мин 40 чэщ-зымафэм ыгъэкъэбзэнэу кIуачIэ иIэу, «пусковой комплексищ» агъэуцущт.
Ирек Файзуллиным апэрэ комплексыр зэрашIырэр, зынагъэсыгъэр зэригъэлъэгъугъ. 2021-рэ илъэсым итыгъэгъэзэ мазэ ащ иапэрэ Iахь аухынышъ атIупщынэу ары зэрэщытыр. Ащ ишIуагъэкIэ сооружением кубометрэ мин 20-кIэ нахьыбэу чэщ-зымафэм ыгъэкъэбзэн ылъэкIынэу хъущт. 2022-рэ илъэсым апэрэ «пусковой комплексыр» зэрэщытэу атIупщын гухэлъ яI.
Мы уахътэм псым икIуапIэхэр агъэпсых. Специалистхэм къызэраIуагъэмкIэ, механическэуи, биологическэуи агъэкъэбзэнэу, зэпахырэ уз къыхэмыкIынымкIэ ищыкIагъэхэри рашIылIэнхэу тыгъэгъэзэ мазэм рагъэжьэщт.
УФ-м псэолъэшIынымкIэ ыкIи псэупIэ-коммунальнэ хъызмэтымкIэ иминистрэ «очистной» псэуалъэм игъэкIэжьын дакIоу ощхыпсыр зэрылъэдэжьырэ системэми зегъэушъомбгъугъэн фаеу зэрэщытым къыкIигъэтхъыгъ.
Нэужым ащ республикэм икъэлэ шъхьаIэ псэу IэкIахьэрэр зыфэдэм, псырыкIопIакIэу ашIырэр зынагъэсыгъэм защигъэгъозагъ. УФ-м и Правительствэ и Тхьаматэу Михаил Мишустинымрэ АР-м и ЛIышъхьэу КъумпIыл Муратрэ зэIукIэгъоу яIагъэми мы Iофым щытегущыIагъэх. Республикэм ипащэ къызэриIуагъэмкIэ, ар километри 129-рэ мэхъу, IофшIэнхэр гъунэм рафылIагъэх, илъэсэу къихьагъэм иапэрэ квартал имыкIызэ аухынэу ары зыуж итхэр.
АР-м ивице-премьерэу Сапый Вячеслав УФ-м псэолъэшIынымкIэ ыкIи псэупIэ-коммунальнэ хъызмэтымкIэ иминистрэ къызэрэщигъэгъозагъэмкIэ, Мыекъуапэ имызакъоу, къыпэIулъ псэупIэхэм ащыщыбэхэми псыр зэпыу фэмыхъоу къаIэкIэхьанэу мыщ амал къытыщт. Проектым къыдыхэлъытагъэу псым гъучIэу хэлъыр хэгъэкIыгъэным фытегъэпсыхьэгъэ станциери атIупщыгъ. Ащ ишIуагъэкIэ гъожьышъо имыIэжьэу, къабзэ хъугъэ.
ПсыубытыпIэу къутырэу Гавердовскэм дэтым Iоф зэришIэрэми зэIукIэгъум игугъу щашIыгъ. Ащ хэхьэрэ псы къычIэщыпIэ 20-м щыщэу 13-р ары мы уахътэм Iоф зышIэрэр. Ащ фэшI «Росгеологием» испециалистхэр къырагъэблэгъэнхэшъ чIычIэгъым псы къызщычIэпщын плъэкIыщт чIыпIэхэм алъагъэхъунхэу Ирек Файзуллиным предложение къыхьыгъ.
АР-м и ЛIышъхьэ ипресс-къулыкъу.