ГумэкIыгъо чIыпIэ тызифэкIэ цIыфыр IэпыIэгъу щыкIэн зэрилъэкIыщтыр къыдгурэIо. ЫпэкIэ тизакъоу тыпсэун амал тиIэу тлъытэщтыгъэми, гузэжъогъу такъикъхэм нэмыкIэу тыгупшысэу етэгъажьэ.

Мыщ фэдэ уахътэм зыIэ къыпфэзыщэирэ цIыфым дунаим тет мылъкур къы­уитыгъэм фэдэу огъэлъапIэ, ишIушIагъэ бэрэ угу иогъэлъы. Синепэрэ тхыгъэ зыфэгъэхьыгъэр цIыфхэм IэпыIэгъу афэхъунхэм сыдигъуи фэхьазыр ныбжьыкIэхэр ары.

Эльвина Эрсан илъэс 22-рэ ыныбжь. Ащ Мыекъуапэ дэт я 4-рэ лицеир дышъэ медалькIэ къыухыгъ ыкIи Мыекъопэ къэралыгъо технологическэ университетым чIэхьагъ. Пшъэшъэ ныбжьыкIэр фармацевтэу еджагъ. Апшъэрэ еджапIэр диплом плъыжькIэ къыухыгъ.

— 2020-рэ илъэсым апшъэрэ гъэсэныгъэ зэрэзэзгъэгъотыгъэр къэзыушыхьатырэ тхылъыр къысатыжьыгъ. Волонтер движением сызыхэхьагъэр бэшIагъэп. Пандемием илъэхъан IэпыIэгъу сафэхъунэу къысэджэгъагъэх. Сэри бэрэ семыгупшысэу сыкIуагъ, — къытфеIуатэ Эльвинэ. — А уахътэм тиIэпыIэгъу зищыкIагъэм дэжь зыдгъазэщтыгъ. Телефоным упчIэ зиIэу къытеохэрэм упчIэжьэгъу тафэхъущтыгъ, къэлэ администрациеми тишIуагъэ едгъэкIынэу тыкIогъагъ. Джащ фэдэу унэм къимыкIырэмэ ящыкIэгъэ Iэзэгъу уцхэр афэтхьыщтыгъэх.

Ежь къэсымэджэным тещыныхьэу, е ышIэрэм ыгъэпшъыгъэу къыщыхъоу зы такъикъ тигущыIэгъу къекIугъэп. Сыдигъуи зэгупшысэщтыгъэр амалэу иIэмкIэ цIыфхэм ишIуагъэ зэраригъэкIыщтыр ары.

— Пандемием илъэхъан общественнэ транспортри икъоу кIощтыгъэп, — игукъэкIыжьхэмкIэ къыддэгуащэ Эльвинэ. —Пчыхьэрэ лъэсэу унэм тыкIо­жьыщтыгъэ. Iэ­пы­Iэгъу щыкIэ­рэм тишIуагъэ едгъэкIын амал зэ­рэтиIэм кIуа­чIэ къыт­хилъ­хьэ­щтыгъэ, джыри нахьыбэ зэшIо­тхы­ным тыпы­лъыгъ.

Пандемием илъэ­хъан цIыф­хэм чанэу IэпыIэгъу зэрафэ­хъугъэм фэшI ОНФ-м и Гупчэ штаб ипащэ ыцIэкIэ рэзэныгъэ тхылъ пшъэшъэ ныбжьыкIэм къыфагъэшъошагъ. ИIоф­шIэн осэ ин къызэрэфашIыгъэм тигущыIэгъу лъэшэу ыгъэ­гу­шIуагъ.

Джырэ уахъти амалэу иIэм елъытыгъэу Эльвинэ волонтер движением хэлажьэ. ОНФ-м ишъолъыр къутамэу Адыгэ Республикэм щыIэм зэхищэрэ Iофтхьабзэхэм ча­нэу за­къы­щегъэ­лъагъо. БэмышIэу гъот ма­Iэ зиIэ унагъохэм къарыхъухьэгъэ сабыйхэм, сэкъатныгъэ зиIэ кIэлэцIыкIухэм адэжь щыIагъэх, шIухьафтынхэр афахьыгъэх.

Эльвинэ гухэлъ шъхьаIэу зыдиIыгъхэм волонтер лъэныкъор пытэу ахэт. ТапэкIэ ишIэныгъэ IэкIыб къэралыгъом щыхигъэхъоным егупшысэ. Ащ опытэу къыщызIэкIигъэхьащтыр зыдиIыгъэу Адыгеим къэкIожьын, икъэлэ гупсэ щылэжьэн шIоигъоныгъэ иI. Сыд фэдэ гухэлъ ымышIыгъэми волонтерствэр ахэм ахэт зэпытыщт.

Пщыпый Саидэ Мыекъопэ индустриальнэ техникумым щеджэ. Илъэс 17 зыныбжь пшъашъэр джыри еджапIэм чIэсыгъ волонтерхэм якуп зыхахьэм. Техникумыми ащ щыпидзэжьыгъ. «Абилимпикс», «WorldSkills» зыфиIорэ Iофтхьабзэхэм волонтерэу ахэлажьэ.

— ОНФ-м, Урысыем иныбжьыкIэхэм я Союз волонтерэу сахэт, — къытфеIуатэ Саидэ. — Пандемием илъэхъан гъомылэпхъэ Iалъмэкъхэр тыугъоищтыгъэх ыкIи ахэр унэм къи­кIын амал зимыIэ нэжъ-Iужъхэм, джащ фэдэу сымэджэщхэм Iоф ащызышIэрэ врачхэм хьалы­жъохэр афэтщагъэх.

БэмышIэу студентхэм я Мафэ хагъэунэфыкIыгъ. Ащ фэгъэхьыгъэ Iофтхьабзэм Саидэ хэлэ­жьагъ. ТигущыIэгъу къызэриIо­рэмкIэ, уахътэ иIэ зыхъукIэ, игуапэу шIушIэным зыфегъазэ. Хьаулыеу щысыныр ащ ишэнэп. Амалэу иIэмкIэ цIыфхэм IэпыIэгъу афэ­хъуным сыдигъуи фэхьазыр.

— Техникумыр къызысыухыкIэ Мыекъопэ къэралыгъо технологическэ университетым сычIэхьа­жьынэу сыфай. «Ландшафтный дизайн» зыфиIорэ сэнэхьатыр къызIэкIэзгъэхьаным сыкIэхъо­псы, — игухэлъхэмкIэ къыддэ­гуащэ Саидэ. — Творчествэм епхыгъэ сэнэхьатхэм сызIэпащэ. ТапэкIэ шIушIэным илъагъо сырыкIонэу сыфай. СыгукIэ зыдэсIыгъ гухэлъхэр къыздэзгъэхъуным сишъыпкъэу сыпылъыщт.

Мыекъопэ индустриальнэ техникумыр Ольга Хайдуковам мыгъэ къеухы. Ханты-Мансийскэ автоном хэкум къикIыгъэ пшъэ­шъэ ныбжьыкIэр ыпэкIэ волонтер движением хэтыгъэп. Мые­къуапэ еджэныр зыщырегъа­жьэм шIушIэнми нахь пэблагъэ хъугъэ.

— Iофтхьабзэу тызыхэлажьэ­рэм волонтерхэр къекIолIэгъагъэх, — игукъэкIыжьхэмкIэ къыддэгуащэ Ольгэ. — Зигугъу къашIырэ лъэныкъор сшIогъэшIэгъоны хъугъэ ыкIи ащ сы­хэхьанэу гухэлъ сшIыгъэ. Блэ­кIыгъэ илъэсым ичъэпыогъу мазэ къыщегъэжьагъэу волонтер движением сыхэт. ЦIыфхэм шIу зэрафапшIэрэм дакIоу уилэгъу­хэм нэIуасэ уафэхъу, ныбджэгъукIэхэр зэогъэгъотых.

Врачхэм хьалыжъохэр афэзыщэгъэ волонтерхэм тигущыIэгъу ахэтыгъ. Джащ фэдэу ным и Мафэ зэрагъэмэфэкIырэми, аптекэхэр зэрауплъэкIурэми ахэлэжьагъ.

— Техникумыр къызысыухыкIэ волонтерствэр згъэтIылъы­жьыщтэп. Мыекъопэ къэралыгъо технологическэ университетым сычIэхьанэу сэгъэнафэ ыкIи шIушIэным амалэу сиIэмкIэ сыпылъыщт.

Абрэдж Сэтэнай.