Пандемиер къызежьэм, сыд фэдэрэ лъэныкъокIи щыIэныгъэм зэхъо­кIыныгъэшхохэр фишIыгъэх. Анахьэу IофшIэн къиныр зыпшъэ илъынэу хъугъэ медикхэм ямызакъоу, социальнэ IофышIэхэри а сатырым хэуцуагъэх.

Мыхэри непэрэ мафэм илIы­хъужъых. Япсауныгъэ емыблэжьыхэу цIыфхэм IэпыIэгъу зэрафэхъущтхэм ыуж итых. Ащ дакIоу социальнэ IофышIэхэр волонтерхэм ахэтхэу гъэпсэф ямыIэу мы охътэ къиным Iоф ашIагъ. Ахэм ащыщ непэ нэ­Iуасэ шъузыфэсшIымэ сшIоигъо Нэныжъ Саидэ. ЦIыфхэм со­ци­альнэ IэпыIэгъу ягъэгъоты­гъэ­нымкIэ гупчэу Теуцожь рай­оным итым иотделениеу унагъом, ным ыкIи кIэлэцIы­кIугъом афэгъэзагъэм Саидэ ипащ.

Краснодар дэт кооперативнэ институтыр къызеухым, 2010-рэ илъэсым мы гупчэм Саидэ специалистэу IофшIэныр щы­ригъэжьагъ. Нэужым ыпшъэкIэ зигугъу къэтшIыгъэ отделением ипащэу агъэнафи, илъэси 5-м ехъугъэу а IэнатIэр егъэцакIэ. Социальнэ лъэныкъомкIэ менеджерэу ятIонэрэ апшъэрэ гъэсэныгъэ тигущыIэгъу зэригъэгъотыжьыгъ.

Коронавирусыр къызежьэм, социальнэ IофышIэхэми агъэцэкIэн фаем зэхъокIыныгъэхэр фэхъугъэх. Гъунапкъэу хэгъэгум щагъэнэфагъэхэм апкъ къи­кIыкIэ зыныбжь хэкIотагъэхэу унэхэм арысхэм ящыкIэгъэ IэпыIэгъур ягъэгъотыгъэныр не­пэрэ щыIакIэм анахь шъхьаIэ щыхъугъ. Ащ епхыгъэу гуфитхэм яIофшIэн имэхьанэ зы­къиIэтыгъ ыкIи мафэ къэс хэхъо, нахь зэлъашIэ мэхъу. Ар къызкIыхэзгъэщырэр районым ис волонтер пэрытхэм Саидэ ащыщышъ ары.

— ИлъэситIукIэ узэкIэIэбэжьмэ, волонтер купхэр зэхащэнхэу рагъэжьэгъэ къодыеу, апэрэ сатырхэм сахэхьагъ, — къе­Iуатэ Нэныжъ Саидэ. — ЕджакIо сагъакIуи, сертификати къы­сатыгъ. Социальнэ IофышIэм ипшъэрылъ шъхьаIэр гукIэгъу хэлъэу, IэпыIэгъу зищыкIэгъэ цIыфым ишIуагъэ ригъэкIыныр ары. Джащ фэд волонтерхэри. Мы охътэ къинэу тызхэтыгъэм ахэм яшIуагъэ къыщылъэгъуагъ. ШIушIэ IэпыIэгъоу алъыдгъэIэсыщтыгъэм дакIоу, нэжъ-Iужъхэр анахь зыкIэхъопсыщтыгъэхэр гущыIэгъу тафэхъуныр ары.

Саидэ къызэриIуагъэмкIэ, цIыфхэм социальнэ IэпыIэгъу ягъэгъотыгъэнымкIэ гупчэм иIофшIэн зэрэщытэу зэхъокIыгъагъ. Отделениехэр зыфэгъэзэгъэхэ Iофым емылъытыгъэу зэдеIэжьыгъэх. Теуцожь район администрацием илиние плъыр IэпыIэгъу зищыкIагъэу къытео­хэрэм ялъэIу социальнэ Iофы­шIэхэм афырагъэхьызэ, мэфэ къинхэр зэпачыгъэх. Шъхьэза­къоу, сымаджэу земыкIошъу­хэрэр анахьэу къызкIэлъэIущтыгъэхэр ящыкIэгъэ Iэзэгъу уцхэр аIэкIэгъэхьэгъэныр ары. Узым ыгъэщтэгъэ нэжъ-Iужъхэр къэбар тэрэз зэхахыным щыкIэщтыгъэх, ахэм волонтерхэр гущыIэгъу афэхъущтыгъэх. Ащ нэмыкIэу, Адыгеим и ЛIышъхьэу КъумпIыл Мурат, политикэ партиеу «Единая Россия» зыфиIорэм и Адыгэ шъолъыр къутамэ, лъэкI зиIэхэм ацIэкIэ къащэгъэ шIушIэ IэпыIэгъоу гъомылэпхъэ зэфэшъхьафхэр зыдэлъ къэмланэхэр гъогогъу пчъагъэрэ къырагощэкIыгъэх. Ахэр зизакъоу псэурэ нэжъ-Iужъхэу, зигъот макIэхэу, сэкъатныгъэ зиIэхэу, сабыибэ зэрысхэу унэгъо 344-мэ афащагъэх.

Саидэ пэщэныгъэ зыдызэрихьэрэ отделениеу унагъом, ным ыкIи кIэлэцIыкIугъом афэгъэзагъэм къытедгъэгущыIагъ. Ащ иучет зигъот макIэхэу, сабыибэ зэрысхэу, сэкъатныгъэ зиIэхэу нэбгыри 117-рэ фэдиз хэт. КIэлэцIыкIу 11-мэ сэкъатныгъэ яI. Сыд фэдэрэ шIушIэ IэпыIэгъоу районым къакIорэр мыхэм аIокIэ.

— МэфэкI мафэхэу ИлъэсыкIэм, кIэлэцIыкIухэр къэухъумэгъэнхэм и Дунэе мафэ, Iоныгъом и 1-м яхъулIэу къытэпхыгъэ ныбжьыкIэ цIыкIухэр зэ­рэдгъэгушIощтхэм тыпылъ, — къеIуатэ Саидэ. — Тигупчэ ипащэ игукъэкIыкIэ илъэсыкIэ шIухьафтын цIыкIухэр гъэ къэс афэтэшIых. Джащ фэдэу, амал зыIэкIэлъ спонсорхэм талъэхъу, яшIушIэ IэпыIэгъу мы сабый купым зэрищыкIагъэр агурытэгъаIо ыкIи бэмэ яшIуагъэ къытагъэкIы. Илъэс зэкIэлъыкIохэм илъэсыкIэ шIухьафтынхэр, еджэн, тхэн ыкIи сурэтшIыным щагъэфедэрэ пкъыгъохэр къытфэзыщэхэрэм ащыщых кIэлэцIыкIу фондэу «Инициатива» зыфиIоу Краснодар дэтыр, унэе предпринимателэу Дэкумэ Аскэр, Уджыхъу Сусанэ зипэщэ кIэлэцIыкIу фондэу «Чужих детей не бывает». Тиучет хэт кIэлэцIыкIухэм къэралыгъо хабзэм илIыкIохэми анаIэ къатет. Япсауныгъэ зыщагъэпытэщт зыгъэпсэфыпIэхэм мыхэр агъакIох.

Саидэ кIэлэцIыкIухэм къатегущыIэ зыхъукIэ, ахэм зэра­фэ­гумэкIырэр, зэрикIасэхэр къы­хэщы. Социальнэ IофышIэу Iоф пшIэныр къызэрыкIоу ыкIи псын­кIагъоу щытэп. Ащ IэпэIэсэныгъэ гъэнэфагъэ ищыкIагъ, цIыфхэм, обществэм зэпхыныгъэ адэпшIышъунэу щыт. Ащ дакIоу, нэбгырэ пэпчъ екIолIэкIэ гъэнэфагъэ къыфэбгъоты­шъун фае, джа шэпхъэшIухэм атетэу тигущыIэгъу мэлажьэ.

— Социальнэ IофышIэм нэшэнэ шъхьаIэу хэлъынхэ фаеу къысшIошIырэр шIур, гукIэгъуныгъэр ыкIи пшъэдэкIыжьэу ыхьырэр зэхишIэныр ары, — еIо Нэныжъ Саидэ. — Къы­тэпхыгъэ цIыфхэм сыд фэдэ шIушIэ IэпыIэгъу афэтщагъэми, зыгорэм дгъэкIуагъэхэми сэ сшъхьэкIэ сакIэмыупчIэжьэу хъурэп. Агу рихьыгъэмэ, анахьэу ежьхэр зыфэягъэхэм, гъо­гум зэрэтехъухьагъэхэм защы­сэгъэгъуазэ. Ар ягуапэ мэхъу.

Саидэ иIофшIэн ыгъэпшъыгъэу, зыгъэпсэфыгъо лъыхъухэ­рэм ащыщэп. ПшъэдэкIыжьэу ыхьырэр зэхишIыкIызэ, къиныгъохэм къамыгъащтэу ипшъэ­рылъхэр щытхъу хэлъэу егъэцакIэх. ГукIэгъурэ зэхэшIыкIырэ зыхэлъ цIыф. ИIофшIэнкIэ шIу зэришIэрэм гухахъо хегъуатэ. Ащ ишыхьат щытхъу ыкIи рэзэныгъэ тхылъхэмкIэ къызэрэхагъэщырэр.

Iэшъынэ Сусан.