Лъэпкъ проектэу «Псауныгъ» зыфиIорэм илъэныкъо анахь шъхьаIэхэм ащыщ гу-лъынтфэ узхэр къэмыгъэхъугъэнхэм дэлэжьэгъэныр. Непэ зиду­най зыхъожьыхэрэм янахьыбэм ушъхьагъоу афэхъурэр мы узхэр арых.

2021-рэ илъэсым шъолъыр проектэу «Гу-лъынтфэ узхэм ябэныгъэныр» зыфиIорэр пхырыщыгъэным фэшI сомэ миллион 58,8-рэ къыфыхагъэкIыгъ. Мы мылъкумкIэ медицинэ оборудовании 123-рэ Адыгэ республикэ сымэджэщым хэт лъынтфэхэм зыщяIэзэхэрэ гупчэм, къэлэ сымэджэщым лъынтфэхэм зыщяIэзэхэрэ иотделение ыкIи Адыгэкъалэ дэт сы­мэджэщым къафащэфынхэ гу­хэлъ щыI.

— Медицинэ организациер оборудованиекIэ зэрэзэ­тегъэпсыхьагъэр IэпыIэгъоу цIыфхэм арагъэгъотырэм изытет занкIэу епхыгъ, — къыIуагъ Адыгэкъалэ исымэджэщ иврач шъхьаIэ.

Адыгеим 2020-рэ илъэсым лъыкъекIокIым епхыгъэ узхэм апкъ къикIыкIэ дунаим ехыжьыгъэхэм япчъагъэ процент 1,1-кIэ нахь макIэ хъугъэ ыкIи нэ­бгырэ мини 100-м телъытагъэу хъу­гъэ-шIэгъэ 614,6-рэ (2019-рэ илъэсым — 621,5-рэ) атхыгъ.