Мэзэе мазэм и 1-м къыщыублагъэу Урысые политикэ партиеу «Единэ Россием» ифрак­циеу АР-м и Къэралыгъо Совет — Хасэм щыIэм идепутатхэм онлайн шIыкIэм тетэу цIыф­хэм зэIукIэгъухэр адашIых.

Бэрэскэжъые мафэм Пар­ламентым ыкIи фракцием япащэу Владимир Нарожнэм игуа­дзэу Шъэо Аскэр игъусэу «Единэ Россием» и Тхьама- тэу Дмитрий Медведевым и Общественнэ приемнэ цIыфхэр рагъэблэгъагъэх. Медицинэм, псэупIэ-коммуналънэ хъызмэтым, нэмыкIхэм алъэныкъокIэ гумэкIыгъохэр яIэхэу нэбгы-риплI мы мафэм закъыфэзгъэзагъэр.

ГущыIэм пае, ижъэжъые зэ­рэзэблахъугъэм къыхэкIыкIэ апэрэ купым хэхьэрэ сэкъатныгъэ зиIэ хъугъэм Iэзэгъу уцэу «Мимпар» зыфиIорэр ищыкIагъ, ыпкIэ хэмылъэу къыратын фаеу щыт, ау ар зипшъэ­рылъхэм агъэцакIэрэп. НэмыкIэу къяолIагъэхэм гъэстыныпхъэ шхъуантIэр къаIэкIэзгъэ­хьэрэ компанием ащ ыуасэ къызэрилъытагъэм, псэупIэм игъэфедэн ыкIи ащ игъэцэ­кIэжьын, хьыкум приставхэм яIофшIэн зэрэзэхащэрэм афэгъэхьыгъ гумэкIыгъоу къыра­хьылIагъэхэр.

Республикэ Парламентым ипащэхэм нэбгырэ пэпчъ иIоф хэзыгъэ имыIэу зыщагъэгъо­загъ, зэкIэми Iоф адашIэнэу агъэгугъагъэх.

Владимир Нарожнэм пстэумэ ауж иеплъыкIэхэр къыриIотыкIыхэзэ къызэрэхигъэщыгъэмкIэ, депутатхэр общественнэ приемнэхэм, район гупчэхэм зэIукIэгъухэр зэращашIыхэрэм имызакъоу, пэIудзыгъэ псэу­пIэхэми ащэIэх, ахэм адэсхэр рагъэблагъэх.

— Джырэ фэдэ охътэ къиным цIыфхэм яIофыгъохэр ежьхэм язакъоу зэшIуахынхэу къэдгъа­нэхэ хъущтэп, — къыIуагъ Пар­ламентым и Тхьаматэ. — Псау­ныгъэм икъэухъумэни тынаIэ тетын фаеу зэрэщытыр къыдэт­лъытэзэ, зэIукIэгъухэр онлайн шIыкIэм тетэу зэхэтэщэх. Депутатхэр зыщыхадзыгъэхэми бэрэ ащэIэх, цIыфхэр рагъэблагъэх, ахэм ятхьаусыхэхэм, ягу­мэкIыгъохэм Iоф адашIэ, ищыкIагъэ зыхъукIэ, муниципальнэ образованиехэми IэпыIэгъу афэхъух. Ар депутат IофшIэным анахь шъхьаIэу хэтхэм ащыщ.

АР-м и ЛIышъхьэу, «Единэ Россием» и Адыгэ шъолъыр къутамэ и Секретарэу КъумпIыл Мурат цIыфхэм Iоф адэшIэгъэным нахьыбэу анаIэ ты­рагъэтынэу пшъэрылъ къазэ­рафигъэуцурэми Парламентым ипащэ къыкIигъэтхъыгъ.

Къэралыгъо Советым — Ха­сэм и Тхьаматэ игуадзэу Шъэо Аскэр мыщ фэдэ зэIукIэгъухэр зы темэ гъэнэфагъэ фэгъэхьыгъэу бэрэ къызэрэхэкIырэр, ау ащ пае къэмынэу нэмыкI гумэкIыгъоу цIыфхэм къырахьы­лIэхэрэри Iэпэдэлэл зэрамы­шIы­хэрэр ипсалъэ къыщыхи­гъэщыгъ.

— Зы нэбгырэ иIофыгъо тыхэмыплъэу, ыуж тимытэу къэд­гъанэрэп, — къыIуагъ ащ. — ЦIыфэу гуIэрэр, охътабэ те­мышIэу зиIоф ухэплъэн фаеу щытыр, зыщырагъэблагъэхэрэ мэфэ гъэнэфагъэм емыжэу къытэолIэн ылъэкIыщт. Зыкъытфэзгъазэхэрэм ягумэкIыгъохэр дэгъэзыжьыгъэ зэрэхъурэр ары общественнэ приемнэм иIофшIэн къэзыгъэлъагъорэр.

Зэпахырэ узэу дунаир зэ­лъызыкIугъэр къызежьагъэм къыщыублагъэу «Единэ Россием» идепутатхэм хэдзакIохэм зэпымыоу зэпхыныгъэ адыряI, социальнэ нэкIубгъохэр, онлайн шIыкIэхэр къызфагъэфедэхэзэ адэгущыIэх, аIокIэх. ИкIыгъэ 2020-рэ илъэсым гъогогъу 2000 фэдизырэ цIыфхэр рагъэблэгъа­гъэх, упчIэхэм анахьыбэхэр зэшIохыгъэ хъугъэ.

Джащ фэдэу партием ифракцие хэт депутатхэр мызэу-мытIоу медицинэм иIофышIэхэм аIукIагъэх, ялъэIухэм, япредложение­хэм ахэплъагъэх, «Спасибо врачам» зыфиIорэ Iофтхьабзэм яIахь мымакIэу халъхьагъ, IэпыIэгъу афэхъугъэх.

ХЪУТ Нэфсэт.