Нэбгырэ мини 2 фэдизмэ ахалъхьэгъах
КоронавирусыкIэу къежьагъэм пэуцужьрэ вакцинэм ихэлъхьан епхыгъэ Iофтхьабзэр Адыгеим зэрэщыкIорэр джыри зэ шъугу къэтэгъэкIыжьы.
Къалэу Мыекъуапэ пштэмэ, нэбгырэ мини 2 фэдизмэ ар ахалъхьэгъах. Ащ ыуж япсауныгъэкIэ лъэшэу гумэкIыгъо хидзагъэхэу, къяхьылъэкIыгъэу хъугъэ-шIагъэ агъэунэфыгъэгоп.
COVID-19-м пэуцужьырэ прививкэр зыщахалъхьэрэ чIыпIэхэу Мыекъуапэ къыщызэIуахыгъэхэр зыдэщытхэр:
1. къ. Мыекъуапэ, ур. Комсомольскэр, 159; 2. къ. Мыекъуапэ, Чкаловым иур., 77; 3. къ. Мыекъуапэ, я 7-рэ переулкэр, 16; 4. къ. Мыекъуапэ, Жуковскэм иур., 18. 5. ст. Ханскэр, Верещагиным иур., 111.
Мыекъопэ къэлэ поликлиникэм иврач шъхьаIэу ЕмтIылъ Оксанэ къызэриIуагъэмкIэ, вакцинацием екIолIэщтым паспорт ыкIи СНИЛС-р ыIыгъынхэ фае. Ковидым пэуцужьырэ прививкэр зыхалъхьэрэ цIыфым икъэбар федеральнэ реестрэм рагъахьэ. Джащ фэдэу, прививкэм ишIын епхыгъэ Iофтхьабзэм хэлажьэ зышIоигъохэм къэралыгъо фэIо-фашIэхэм я ЗыкI порталкIэ зыхатхэн амал щыI. Ар зымыгъэфедэшъухэрэр медицинэ учреждениехэм зякIуалIэхэкIэ, яшIоигъоныгъэкIэ вакцинэр зэрахалъхьащтым зэреуцуалIэхэрэр атхыщт.
Прививкэр язгъэшIы мыхъущтхэр:
— пэтхъу-Iутхъур къызэузыхэрэр;
— илъэс 18 мыхъугъэхэр;
— вакцинэм хэлъхэр къызэмыкIухэрэр.
Антителахэр цIыфым ыуплъэкIунхэ ищыкIагъэп. Коронавирусыр къызэузыгъэхэм мэзи 6 зытешIэкIэ прививкэр арагъэшIы хъущт.
Вакцинэу «Спутник V» зыфиIорэр мэфэ 21-рэ азыфагоу едзыгъуитIоу ахалъхьэ. А шапхъэм шIокI иIэп, сыда пIомэ иммунитетыр пытэщтэп.