ТелефонкIэ къатыгъ. Урысыем самбэмкIэ изэнэкъокъу Ермэлхьаблэ щэкIо.

— Мэзаем и 2-м зэхэщэн Iофыгъохэр агъэцэкIагъэх, — ­къытиIуагъ Адыгэ Республикэм самбэмкIэ испорт еджапIэ ипащэу, спортымкIэ дунэе класс зиIэ мастерэу Делэкъо Адам. — Мэзаем и 3-м бэнэпIэ алырэгъухэм зэнэкъокъур ащырагъэжьагъ. Илъэс 18-м нэс зыныбжьхэр зэIукIэгъухэм ахэлажьэх.

Урысыем ишъолъырхэм къарыкIыгъэ бэнакIохэр 600-м на­хьыбэ мэхъух. Адыгэ Респуб­ликэм щыщ нэбгырэ 24-рэ Ер­мэлхьаблэ кIуагъэ. ТибэнакIохэр хагъэунэфыкIырэ чIыпIэхэр къыдэзыхыщтхэм ахэфэнхэ алъэ­кIыщтэу тэгугъэ.

Зэнэкъокъум исудьяхэри агъэ­нэфагъэх. Урысыем, Адыгеим яза­служеннэ тренерэу Хъот Юныс ахэм ащыщ.

Хабзэ зэрэхъугъэу, мэзаем и 2-м судьяхэм ушэтынхэр атыгъэх. ШIэныгъэ куухэр Ю. Хъотым къыгъэлъэгъуагъэх. Апэрэ мафэм къыщыублагъэу зэнэкъокъум исудьяу щыт.

— Мэзаем и 6-м хэгъэгум изэнэкъокъу аухыщт, — къеIуатэ Хъот Юныс. — Апэрэ чIыпIэхэр къыдэзыхырэ бэнакIохэр дунаим самбэмкIэ изэнэкъокъу хэлэжьэщтых, тыжьыныр къыдэзыхы­гъэхэр Европэм изэIукIэгъухэм ащыбэнэщтых. Тэ, судьяхэм, ти­пшъэрылъхэр дэгъоу зэрэд­гъэцэкIэщтхэм тыпылъ.

ТибэнакIохэм пэшIорыгъэшъэу ацIэхэр къетIохэрэп — ащи узэгупшысэн хэлъ. Зищытхъу тIощтхэр зэнэкъокъум къыгъэлъэгъощтых. Къыхэдгъэщмэ тшIоигъор апэрэ мафэм Адыгеим ихэшыпыкIыгъэ командэ хэтхэу самбэмкIэ банэхэрэм щысэшIу къы­зэрагъэлъагъорэр ары.

Къыхэтыутынэу дгъэхьазырзэ...

Хэгъэгум самбэмкIэ изэнэ­къокъу Ермэлхьаблэ зэрэщырагъэжьагъэм фэгъэхьыгъэ тхы­гъэ­хэр къыхэтыутынхэу дгъэхьа­зырыхэзэ, къэбар гушIуагъохэр къытлъыIэсыгъэх. Мэлгощ Адам, кг 49-рэ, дышъэ медалыр къыдихыгъ, Гъомлэшк Анзор, кг 53-рэ, джэрз медаль къыхьыгъ, нэмыкI ныбжьыкIэхэри хагъэунэфыкIырэ чIыпIэхэм афэбанэх.