Адыгэ къэралыгъо университетым и Мыекъопэ къэралыгъо гуманитар-техническэ колледж Ва­лерий Исламовыр щеджэ, спортыр сэнэхьатэу къыхихыгъ.Физкультурэмрэ спортымрэ за­фигъасэзэ, зэнэкъокъухэм Валерий Исламовыр ахэлажьэ. 2020-рэ илъэсым Урысыем кушъхьэ­фэчъэ спортымкIэ изэIукIэгъухэм джэрзыр къащыди-хыгъ.

— КIэлэ ныбжьыкIэм ишъыпкъэу Iоф зыдешIэжьы. Исэнау­щыгъэ къызэIуихызэ, икъулай зэ­нэкъокъухэм нахьышIоу ащи­гъэфедэ хъугъэ, — къытиIуагъ Адыгэ Республикэм кушъхьэфэчъэ спортымкIэ и Федерацие ипащэу Анатолий Лелюк. — Валерий шэнышIоу хэлъхэм зэу ащыщ спортышхом хэгъозагъэхэм щысэ атырихыныр.

СтIашъу Мамыр, Александр Ев­тушенкэр, Александр Куликовскэр Адыгеим щыцIэрыIох, Урысыем кушъхьэфэчъэ спортымкIэ ихэшыпыкIыгъэ командэ хэтых. Ахэр тиныбжьыкIэхэм яупчIэжьэгъух.

СтIашъу Мамыр зэрилъытэ­рэмкIэ, тикIэлэеджакIохэм спорт­смен дэгъу хъун зылъэкIыщтэу ахэтыр макIэп. ЯгуетныгъэкIэ къа­хэщырэмэ Валерий Исламовыр ахалъытэ.

Адыгэ Республикэм кушъхьэ­фэчъэ спортымкIэ ихэшыпыкIыгъэ командэ В. Исламовыр аштагъ. Тиспортсмен анахь дэгъухэм ягъу­сэу Адлер щыкIогъэ уплъэкIун зэIукIэгъухэм ахэлэжьагъ, иIэпэ­Iэсэныгъэ зэрэхигъахъорэр къыгъэлъэгъуагъ.

2020-рэ илъэсым Адыгэ Рес­пуб­ликэм испортсмен анахь дэгъу­хэу зыцIэ къыраIуагъэхэм Ва­лерий Исламовыр зэращыщым фэшI тыфэгушIуагъ. Тренерэу Юрий Курочкиными гущыIэ фабэхэр фэ­тIуагъэх.

Джырэблагъэ Валерий Исламовыр Урысыем спортымкIэ имастер хъугъэ. ГушIогъуитIур къызэ­кIэлъыкIуагъ. ЩытхъуцIэхэм спорт­смен ныбжьыкIэр агъэгушхо. Адыгэ Республикэм ихэшыпы­кIыгъэ командэ хэтэу мы мафэхэм Тыркуем кIуагъэ, дунэе зэIу­кIэгъухэм ахэлэжьэщт. В. Исламовым ар ушэтыпIэшIу фэхъущт.

Сурэтым итыр: Урысыем спортымкIэ имастерэу Валерий Ис­ламовыр.