Сергей Левченкэм инасып гъогу
«2020-рэ илъэсым икIэлэегъэджэ анахь дэгъу» зыфиIорэ зэнэкъокъум изэфэхьысыжьхэр мэзаем и 2-м къалэу Волгоград щашIыгъэх.
Мы Iофтхьабзэр зызэхащэрэм къыщегъэжьагъэу Мыекъуапэ щыщ кIэлэегъаджэ апэрэу финалым ихьагъ икIи анахь дэгъоу зыкъэзыгъэлъэгъогъэ нэбгы-ритфымэ ащыщ хъугъэ. Сергей Левченкэр Мыекъопэ гурыт еджапIэу N 7-м хьисапымкIэ ыкIи гъэсэныгъэ тедзэ зыщарагъэгъотырэ республикэ естественнэ-хьисап еджапIэм якIэлэегъадж.
Зэнэкъокъум иуцугъо пстэуми Сергей Левченкэм ишIэныгъэхэр дэгъоу къыщигъэлъэгъуагъэх, жюрим ащ осэшIу къыфишIыгъ.
«Илъэсым икIэлэегъаджэ упчIэ ет» зыфиIорэ пресс-конференциер зэнэкъокъум иаужырэ уцугъуагъ. Журналистхэм, кIэлэегъаджэхэм, ны-тыхэм, кIэлэеджакIохэм, апшъэрэ еджапIэхэм ястудентхэм яупчIэхэм нэбгыритфымэ джэуапхэр къаратыжьыгъэх. Анахь дэгъоу зыкъэзыгъэлъэгъуагъэр ыкIи «2020-рэ илъэсым икIэлэегъэджэ анахь дэгъу» зыфиIорэ щытхъуцIэр зыфагъэшъошагъэр Ростов-на-Дону дэт классическэ элитнэ лицеим хьисапымкIэ икIэлэегъаджэу Михаил Гуровыр ары.
Джащ фэдэу анахь дэгъухэм ащыщ хъугъэх Санкт-Петербург дэт гимназиеу N 166-м хьисапымкIэ икIэлэегъаджэу Иван Меньшиковыр, къалэу Череповец дэт гуманитар гимназием урысыбзэмрэ литературэмрэ ащязыгъэшIэрэ Диана Минец ыкIи къалэу Улан-Удэ игимназиеу N 59-м урысыбзэмрэ литературэмрэкIэ икIэлэегъаджэу Елена Цыдыповар.
УФ-м и Президентэу Владимир Путиныр зэнэкъокъум хагъэунэфыкIырэ чIыпIэхэр къыщыдэзыхыгъэхэм аIукIагъ, ахэм афэгушIуагъ.
Сергей Левченкэм Iофыгъо шъхьаIэу къыIэтыгъэр интернетым иамалкIэ егъэджэныр нахь дэгъоу зэхэщэгъэныр ары.
Делэкъо Анет.