УФ-м IофшIэнымкIэ иминистрэу Антон Котяковым «Гай­даровскэ форумым» къызэрэщиIуагъэмкIэ, илъэситIу-щы­кIэ нэбгырэ миллиони 5 — 6-мэ пэIудзыгъэ шIыкIэм те­тэу Iоф ашIэщт.

— Непэрэ мафэм ехъу­лIэу мыщ фэдэ шIыкIэм тетэу нэбгырэ миллиони 2,7 — 2,8-рэ мэлажьэх. Ар къэралыгъом пстэумкIи Iоф щызышIэхэрэм япроценти 5 мэхъу, — къы­Iуагъ министрэм. — Блэ­кIыгъэ илъэсым жъоны­гъуакIэмрэ мэкъуогъумрэ Iоф зышIагъэхэм япроцент 11-м пэIудзыгъэ шIыкIэм тетэу лэжьагъэх. Пандемием ыпкъ къи­кIыкIэ цIыфхэр унэм исыгъэх. Джырэ уахътэ пчъа­гъэхэр нахь макIэ хъугъэ, ау илъэситIу-щыкIэ проценти 10-м текIолIэнэу специалистхэм къаIо.

Министрэм зэрилъытэ­рэмкIэ, блэкIыгъэ илъэсым псынкIэу пэIудзыгъэ шIыкIэм техьэгъагъэхэмэ, джы игъорыгъоу ащ екIолIэщтых. Iоф зышIэрэми, езы­гъашIэрэми яшIоигъоныгъэхэр къыдалъытэщтых.

— Ащ нэмыкIэу, мыщ фэдэ шIыкIэм тетэу Iоф ашIэным компаниехэм зыфагъэсагъ, ящыкIэгъэ Iэ­мэ-псымэхэри зэрагъэгъотыгъэх. Непэ пшъэрылъ шъхьаIэу тиIэр Iоф зышIэ­хэрэми, языгъашIэхэрэми яшIоигъоныгъэхэр къы­дэлъытагъэхэу зэхъокIыныгъэхэм такъыфэкIоныр ары, — къыIуагъ Антон Котяковым.

«Mail.Ru Group» зыфи­Iорэм игенеральнэ пащэу Борис Добродеевым къызэриIуагъэмкIэ, пэIудзыгъэ шIыкIэм тетэу Iоф ашIэным компаниехэр фэхьазырых. Офисхэр амыгъэфедэжьхэу, мыщ фэдэ шIыкIэм техьанхэр компаниехэмкIэ нахь федэщт. Ау мыщ тетэу ренэу Iоф ашIэн алъэкIыщтэп. Зэ­дэлажьэхэрэ цIыфхэр зэ­IукIэнхэ фаеуи хъущт.

Ащ къыхэкIэу пэIудзыгъэ шIы­кIэр IофшIэнымкIэ нахь агъэфедэ хъугъэ­ми, офисхэри ящыкIэгъэщтых.

— ПэIудзыгъэ шIыкIэм тетэу Iоф зышIэхэрэм языщанэ зыми фэмыежьэу мэхъу. Ащ фэдэхэм IэпыIэгъу уафэхъун фае. Ау бэхэр унэм арысхэу шIуагъэ къахьызэ лэжьэнхэ алъэкIы, — къыIуагъ Борис Добродеевым.

Абрэдж Сэтэнай.