Урысые политическэ партиеу «Единэ Россием» пшъэрылъэу къыфишIыгъэр ыгъэцакIэзэ, Къэралыгъо Думэм физическэ культурэмкIэ, спортымкIэ, зекIонымкIэ ыкIи ныбжьыкIэхэм яIофхэмкIэ и Комитет хэтэу Хьасанэкъо Мурат псауныгъэм икъэухъумэн епхыгъэ IофыгъохэмкIэ Урысые политическэ партиеу «Единэ Россием» и Тхьаматэу Д. А. Медведевым ишъолъыр общественнэ приемнэ пэIудзыгъэ шIыкIэм тетэу цIыфхэм щадэгущыIагъ.Республикэм ис нэбгырэ заулэмэ зыгъэгумэкIырэ IофыгъохэмкIэ Къэралыгъо Думэм идепутат зыкъыфагъэзагъ. ГущыIэм пае Мыекъуапэ дэс нэбгырэ заулэ ащ елъэIугъ коронавирусым ыуж япсауныгъэ зэтеуцожьынымкIэ IэпыIэгъу къафэхъунэу. Джащ фэдэу технологие пэрытхэр яIэубытыпIэу операцие зыфашIыгъэ пшъэшъэ­жъыеу илъэс зыныбжьым янэ Хьасанэкъо Мурат зыкъыфигъэ­загъ сэкъатныгъэу иIэмкIэ пшъэшъэжъыер купэу зыхахьэ­рэм игъэунэфынкIэ IэпыIэгъу къыфэхъунэу. Федеральнэ кли­никэ заулэмэ нахь псынкIэу ачIэгъуалъхьэхэ зэрашIоигъор нэбгырэ заулэмэ къаIуагъ.

— Хэгъэгуми, Урысые политическэ партиеу «Единэ Россиеми», Адыгейми япащэхэм зэрэзэдырагъаштэрэм ишIуагъэ­кIэ республикэм икъулыкъухэу псауныгъэм икъэухъумэн фэгъэ­загъэхэм непэ зыпкъ итэу Iоф ашIэ. ЦIыфхэм жъугъэу вакци­нэр зыхарагъалъхьэу зэраублагъэм пандемием текIонхэмкIэ ишIуагъэ къызэрэкIощтым, нэб­гырабэхэмкIэ ар хэкIыпIэ за­къоу зэрэщытым щэч хэлъэп, — хигъэунэфыкIыгъ парламентарием.

Сымаджэхэм икъоу анаIэ зэратырагъэтырэм фэшI респуб­ликэм иинфекционнэ госпитальхэм яврачхэм зэрафэразэхэр нэбгырабэмэ къаIуагъ. Iофыбэ зэратегъэуагъэм емылъытыгъэу госпитальхэм аIутхэм псэемыблэжьэу Iоф зэрашIэрэм, сымаджэхэм япсауныгъэ зэтегъэу­цожьыгъэнымкIэ IэпэIэсэныгъэ­шхо зэрахэлъым ягугъу къа­шIыгъ.

— Сымэджагъэхэу зипсауныгъэ зэтеуцожьыгъэхэм врач­хэм яIофшIэн осэшхо къызэрэфашIырэм къегъэлъа­гъо ахэм яIоф хэшIыкIышхо зэрэфыряIэр. ЦIыфхэр джарэущтэу врачхэм зэрафэразэхэм яфэмэ-бжьымэ мы лъэныкъом щаштэрэ унашъохэм атыре­хьэ, — къыIуагъ Хьасанэкъо Мурат.

Республикэм исхэм зыкъызэрэфагъэзэгъэ Iофыгъохэм ышъхьэкIэ гъунэ зэралъифыщтыр, ахэмкIэ пшъэрылъ гъэнэфагъэхэр зэрафишIыгъэхэр, загъэцэкIэщт пIалъэхэр зэри­гъэнэфагъэхэр депутатым къы­Iуагъ. Адыгэ Республикэм игъэцэкIэкIо хэбзэ къулыкъухэ­ри мы Iофтхьабзэм изэхэщэн къызэрэхэлэжьагъэхэр хэзгъэу­нэфыкIы сшIоигъуагъ.

Къандор Анзор.

Урысые Федерацием и Федеральнэ ЗэIукIэ и Къэралыгъо Думэ идепутат иIэпыIэгъу.