Джырэблагъэ Краснодар краим и Шытхьэлэ район ипоселкэу Южнэмрэ къутырэу Ивановскэмрэ зэзыпхырэ автомобиль гъогум хъу­гъэ-шIагъэу къытехъухьагъэм ыпкъ къикIы­кIэ нэбгырэ миным ехъумэ электричествэ ямыIэу къэнэгъагъэх.

АвтомашинитIур зызэутэкIым электроэнергиер зэрыкIорэ гъучIычхэр зыпышIэгъэ пкъэур агъэфы­къуагъ. А мэфэ дэдэм «Россети Кубань» и Адыгэ шъолъыр къутамэ испециалистхэр а чIыпIэм кIуагъэх ыкIи охътэ кIэкIым пкъэури, гъучIычхэри зэтырагъэуцожьыгъэх.

Электричествэр къэзытырэ оборудованиер зэрэзэщыкъуагъэм иIоф зэхафынэу хэбзэухъу­мэкIо къулыкъухэм тхылъхэр афагъэхьыгъэх.

Адыгэ электрическэ сетьхэр водительхэм сакъыныгъэ къызхагъэфэнэу къяджэх. Электричествэм икIуапIэхэр щыIэныгъэмкIи, псауныгъэмкIи анахьыбэу щынагъо къэзытыхэрэм ащыщых. Гъогу хъугъэ— шIагъэм ыпкъ къикIэу ахэр зэщыкъохэмэ, ащ хэлэжьагъэхэм тхьамыкIагъо къыфахьын ылъэкIыщт, цIыфхэм электричествэ ямыIэуи къыгъэнэщтых.

Арышъ, скоростым шъуфэсакъынэу, гъогурыкIоным ишапхъэхэр шъумыукъонхэу, тамыгъэхэм шъуалъыплъэнэу энергетикхэр къышъолъэIух.

ЗыгорэкIэ электричествэм икIуапIэхэр зэщыкъуа­гъэхэу, ащ икъэкIон зэпыугъэмэ «Россети Кубань» «илиние плъыр» ыпкIэ хэмылъэу шъукъытеон шъу­лъэкIыщт. Мары телефоныр: 8-800-220-0-220.