Зэрэ Урысыеу вакцинацием епхыгъэ Iофтхьабзэр щэкIо. Респуб­ликэми ар жъугъэу щырагъэжьагъ ыкIи мы уахътэм ехъулIэу нэбгырэ мини 2 фэдизмэ коронавирусым пэуцужьырэ вакцинэр ахалъхьагъ.

Мыщ епхыгъэ упчIэхэу цIыф­хэр зыгъэгумэкIыхэрэм яджэ­уапхэу «Урысые гъэзетым» иэкспертхэм аугъоигъэхэр непэ къыхэтэуты. COVID-19-р къыомыузыным пае прививкэр ябгъэшIыным сыдэущтэу зыфэбгъэхьазырыщта, ащ ыуж сыда пшIэн фаер, иммунитетым улъыплъынэу щыта, нэмыкI упчIэхэми ягугъу къэтшIыщт.

— Сыдэущтэу прививкэм зыфэбгъэхьазырыщта?

— Вакцинацием хэушъхьафыкIыгъэу зыфэбгъэхьазырын ищыкIагъэп. ЗыгорэкIэ умы­шIахэу чъыIэ къыпхэхьагъэу уенэгуемэ, лъыр птымэ на­хьышIу. ЦIыфым ипсауныгъэ зыпкъ итмэ специалист зэфэшъхьафхэр къызэригъэплъынхэ ищыкIагъэп.

— БэмышIэу пэтхъу— Iутхъу е гриппыр къысэузыгъэмэ, сыдигъо вакцинэр зыхязгъалъхьэмэ хъущта?

— Ащ фэдэ узхэмкIэ шъусымэджагъэмэ мазэ нахь мымакIэу тежъугъэшIэн фае. Сыда пIомэ ащ фэдэ сымэджэныгъэм уз гъэтIылъыгъэхэр къырегъа­жьэх, арышъ, вакцинацием шъузщекIолIэщтым мэфэ 30 тежъугъэшIэнэу щыт. Джащ фэдэу адэбз ыкIи иммуннэ системэм епхыгъэ узхэм «ябырсырыгъом» прививкэр ябгъэшIы хъущтэп.

— Нэжъ-Iужъхэм ыкIи сабыйхэм сыдигъо вакцинэр ахаплъхьэ хъущта?

— Мы уахътэ вакцинэр зыхалъхьэхэрэм сабыйхэр ахэт­хэп. Сыда пIомэ а купым къызэрекIущтымкIэ уплъэкIунхэр джыри ашIыгъэхэп. Гъунапкъэу щыIэр илъэс 18-м къыщегъэжьагъэу ары. Ащ шIокIыгъэхэм зэкIэми зыхалъхьан фит.

— КоронавирусымкIэ сы­мэджэгъэ цIыфэу антителахэр зиIэм прививкэ аригъэшIын ищыкIагъа?

— Антитела лъэпкъ зэфэшъхьафхэр щыIэх. Ахэм ащыщ горэ цIыфым иIэмэ, вакцинэр зыхаригъэлъхьанэу ищыкIагъэп.

! Урысыем псауныгъэр къэухъу­мэгъэнымкIэ и Министерствэ къызэрэщаIуагъэмкIэ, прививкэр къып­фашIыным ыпэкIэ тест горэхэр ябгъэ­шIынхэ ищыкIа­гъэп. Ау къыхэмыщэу инфекцие горэ къэу­убытыгъэу къып­шIошIымэ, вакцинэр къыпхалъхьаным ыпэкIэ сы­хьат 48 — 72-рэ иIэу ПЦР-тестыр птын плъэкIыщт. Мыр шIокI имыIэу пшIын фаеу щытэп. Терапевтыр къызыоп­лъырэ нэужым прививкэр къып­фашIымэ хъущт.

— Вакцинэр къызысхалъхьэм пкъынэлынэр плъыр-стырым зэлъи­кIугъ: узыр къыспахыным ищынагъо щыIа?

— Вакцинацием цIыфыр зеуцуалIэкIэ, ащ фэдэ Iофыгъо­хэр къызэрэпыкIын ылъэкIыщтыр къыгурыIонэу щыт. Нэбгырэ пэпчъ зэфэшъхьафэу ащ пхырэкIы. ЗэраушэтыгъэмкIэ ыкIи зыфашIыгъэхэм къызэра­IорэмкIэ, гумэкIыгъо инхэр апэ­кIэкIыгъэп.

!Температурэр анахьыбэмэ градус 38-м нэсэу къыдэкIуае, вакцинэр зыхалъхьэгъэ чIыпIэр макIэу мэузы, Iэпкъ-лъэпкъхэр зэшIуещых. Плъыр-стырыр езыгъэхырэ уцхэм уяшъомэ хъущт. Мэфи 2 — 3 зытешIэкIэ, цIыфыр зыпкъ еуцожьы. Ко­ронавирусым пэуцужьырэм имызакъоу, сыд фэдэрэ вакцинэ къыпхалъхьагъэми ащ фэдэ нэшанэхэр иIэх. Мыщ дэжьым цIыфым узыр къыпыпхынэу щытэп, къэзыуцухьэхэрэмкIэ щынагъоп.

— Прививкэм шIуагъэ къытыгъэмэ ууплъэкIу хъущта?

— «Спутник V» зыфиIорэ вакцинэр арымэ зигугъу къэтшIырэр уплъэкIун горэхэр пшIыжьынхэ ищыкIагъэп, шIуагъэ къызэритырэр гъэнэфагъэу щыт. Ау ежь цIыфыр фаемэ, ишIоигъоныгъэкIэ тест аригъэшIын фит.

— Сэ коронавирусымкIэ сысымэджагъ, ау антителау сиIэхэр макIэ. Прививкэ зязгъэшIынэу щыта?

— ЦIыфым иантителахэр зэрэмакIэр вакцинацие аригъэ­шIынымкIэ унашъо ыштэным иушъхьагъунэу щытэп. Научнэ уплъэкIунхэм къызэрагъэлъэгъуа­гъэмкIэ, цIыфыр сымэджагъэу сыд фэдизми антителахэр пкъы­шъолым хэлъхэми е хэмылъхэми, мэзи 6-м къыкIоцI ухъумэн Iофыр клеткэхэм агъэцакIэ. А пIалъэм нахьыбэрэ иммунитетыр узым пэуцужьымэ джыри аушэтыгъэп.

– IэкIыб къэралыгъом къыщашIыгъэ вакцинэр къэпщэфынышъ, ор-орэу зыхябгъалъхьэмэ хъущта?

— Мы уахътэ Китаим къыщашIыгъэ препаратэу «Конвидеция» зыфиIорэ закъор ары атхынэу Урысыем псауныгъэр къэухъумэгъэнымкIэ и Министерствэ къыIэкIэхьагъэр. Джыри а Iофыр зэшIокIыгъэп. Арышъ, непэкIэ Урысыем IэкIыб къэралыгъохэм къащашIыгъэ вакцинэ къыщекIокIырэп. Интернетым ахэр ащэхэу къырагъэхьэрэ къэбархэр нэпцIыхэшъ зяшъумыгъэгъэдел!

— Вакцинацием ыпкIэ хэмылъэу аIо. Сыда унэе клиникэхэм сомэ мини 2 зыкIаIахырэр?

— COVID-19-м пэуцужьырэ прививкэр унэе клиникэхэми ащашIын фитых. ГущыIэм пае, ащ фэдэ чIыпIэ 30-м ехъу Москва дэт. Медицинэ учреждениехэм а вакцинэр ыпкIэ хэмылъэу къаIэкIэхьэ, ау цIыфым ыпкIэ зыфитырэр врачыр къызэреплъырэр ыкIи фэIо-фашIэр къызэрэфигъэцакIэрэр ары. Муниципальнэ поликлиникэхэм уякIуалIэмэ, вакцинацием ыпкIэ хэлъэп.

Хэутыным фэзыгъэхьазырыгъэр Iэшъынэ Сусан.