Партиеу «Единэ Россием» изаконопроект ишIуагъэкIэ нэбгырэ мил­лиони 3,5-м ехъумэ ягаражхэм ыкIи ахэр зытет чIыгухэм тхьапэхэр апалъхьан алъэкIыщт.

«Гаражнэ амнистием» къызэрэдилъытэрэмкIэ, гаражыр е ар зытет чIыгур зытептхэжьыным пае джы тхьапэу бгъэхьазырыщтыри, ащ дакIоу ахъщэу текIодэщтри нахь макIэ хъугъэ. Росреестрэм къызэриIорэмкIэ, чIыгур зытептхэжьыным пае, гурытымкIэ сомэ мини 5 — 7 фэдиз шъолъырхэм ащытефэ. Ащ нэмыкIэу къэралыгъо пошлинэр птын фае. УФ-м и Къэралыгъо Думэ икомитет итхьама­тэу, проектыр зэхэзыгъэу­цуа­гъэхэм ахэтэу Павел Крашенинниковым къызэриIуагъэмкIэ, джы мы Iофыгъом фэгъэзэгъэщтхэр чIыпIэ зыгъэIоры­шIэжьын къулыкъухэр арых.

Кооперативым зэрэхэтыр, совхозым ыгощы зэхъум гаражыр е ар зытет чIыгур зэ­рэхэфагъэр, ежь иунаеу зэрэщытыр къэзыушыхьатрэ тхылъхэр цIыфым ыугъоинхэ фае. Шъолъыр пэпчъ мы тхьапэхэм япчъагъэ ахигъэхъон ылъэ­кIыщт. 2026-рэ илъэсым гъэтха­пэм и 1-м нэс мы шIыкIэм тетэу Iоф ашIэнэу агъэнафэ.

Мы екIолIакIэм ишIуагъэкIэ гаражхэр зытет чIыгу Iахьхэр нахь ухъумагъэ хъущтых. ДжырэкIэ тхьапэ зыпымылъ псэолъэ шIыгъэхэр риутыжьынхэ ыкIи компенсацие пымылъэу а чIыгур хабзэм ыштэжьын ылъэкIыщт. Законопроектыр заштэ­кIэ, гаражыр ыкIи ар зытешIы­хьэгъэ чIыгу Iахьыр зиехэм яфи­ты­ныгъэхэр ухъумагъэхэ хъущт.

— Зы лъэныкъомкIэ гараж зиIэу, ушъхьагъу гъэнэфагъэхэм апкъ къикIэу ар зытезымытхагъэхэм тишIуагъэ ядгъэкIын фае, ау ащ дакIоу шапхъэу пылъхэр зымыгъэцакIэхэрэр къыхэдгъэщыщтых ыкIи тхьапэхэр агъэхьа­зырынхэм анаIэ тырядгъэ­дзэщт, — еIо Росреестрэм ипащэ игуа­дзэу Алексей Бутовецкэм.

Автомобилистхэм я Урысые обществи законопроектым дыригъэштагъ.

Мыр щыIэныгъэм щыпхыращынэу зэрэрагъэжьагъэм мэхьа­нэшхо иI, къэралыгъом ишъо­лъырхэм зэкIэми ар ащагъэфедэн фае.

Законопроектым къызэрэ-ды­хэлъытагъэмкIэ, сэкъатныгъэ зиIэхэм фэгъэкIотэнхэр яIэщтых. Автомобильхэр зыща­гъэуцун алъэкIыщт чIыпIэхэри ахэм афагъэнэфэщтых. Джащ фэдэу тхьапэ зыпымылъ гара­жыр ыкIи чIыгур цIыфым зы­тритхэжьынымкIэ (зиунаем иду­най ыхъожьыгъэмэ) ищыкIагъэхэр къыдалъытэщтых.

ЗэрагъэнэфагъэмкIэ, 2021-рэ илъэсым гъэтхапэм законопроектыр аштэнэу ары.

Делэкъо Анет.