Урысыем волейболымкIэ изэнэкъокъоу апшъэрэ лигэм иятIонэрэ куп щыкIорэм Мыекъопэ «Динамо-МГТУ-р» хэлажьэ.

Я 7-рэ къекIокIыгъом хэхьэрэ ешIэгъухэр Краснодар краим икъалэу Шытхьалэ щыкIуагъэх. ЗэIукIэгъухэм якIэуххэм шъуащытэгъэгъуазэ.

«Динамо-МГТУ» — «Элвари» Къыблэ-Сахалинск — 3:1 (25:21, 25:20, 19:25, 25:19). ЯтIонэрэ ешIэгъур: «Динамо-МГТУ» — «Элвари» — 3:2 (21:25, 19:25, 25:21, 26:24, 15:8). «Динамо-МГТУ» — «Волжанин» Кострома — 3:1, (28:30, 26:24, 28:26, 25:20). Краснодар краим икомандэу ЦОП-м иешIэгъухэр 0:3-у шIуа­хьыгъэх.

ЕплъыкIэхэр

«Динамо-МГТУ-м» итренер шъхьаIэу, Адыгэ Республикэм изаслуженнэ тренерэу Павел Зборовскэр зэIукIэгъухэр зэрэ­кIуагъэхэм къатегущыIэнэу те­лъэIугъ.

— Апэрэ ешIэгъур «Волжаниным» тшIуихьыгъ, — къеIуатэ Павел Зборовскэм. — ЯтIонэрэ зэIукIэгъур тэрыкIэ къинэу кIуагъэ. Апэрэ едзыгъор 30:28-у «Волжаниным» зехьым, тиешIа­кIохэм ягуетыныгъэ къеIыхыгъэп. Командэм икапитанэу Къошк Руслъан щысэ афэхъузэ, тиешIакIохэр зылъищагъэх, текIоныгъэр 3:1-у къыдахыгъ.

«Элвари» ятIонэрэ ешIэгъур ыхьынымкIэ амалышIухэр иIа­гъэх. Апэрэ ыкIи ятIонэрэ едзыгъохэр «Элвари» ыхьыгъэх. «Динамо— МГТУ-р» зэгурыIоныгъэ хэлъэу ешIагъ, 3:2-у текIоныгъэр къыдихыгъ.

Къыхэтэгъэщых

«Динамо-МГТУ-м» иешIа­кIо­хэм тигуапэу ацIэхэр къетэIох. Ахэр: Къошк Руслъан, Никита Турсковыр, Александр Милецкэр, Даниил Ревенкэр, Илья Ковалевыр, Никита Филипповыр. Нахь ныбжьыкIаIохэр: Егор Разореновыр, Сергей При­сяжнэр.

ЧIыпIэхэр зэтэ­гъапшэх

1. «Волжанин» К — 63 2. «Динамо» И — 56 3. «Кристалл» В — 51 4. «Динамо-МГТУ» — 33 5. «Элвари» — 28 6. «Дагъыстан» — 27 7. «Тюмень» — 26 8. «Ростов-Волей» — 14 9. ЦОП — 8 10. «Грозный-2» — 6

Я 9-рэ къекIокIыгъор

Гъэтхапэм и 3-м зичэзыу къекIокIыгъор Шытхьалэ щырагъэжьэщт. Краснодар краим, Адыгеим, Ижевскэ, Тюмень яволейбол командэхэр зэдешIэщтых. Тикомандэ финалым хэхьащтэу тэгугъэ.