Дунаир зэлъызыкIугъэ зэпахырэ узэу коронави­русым пэшIуекIогъэным медицинэм иIофышIэхэм, волонтерхэм, хабзэм икъулыкъушIэхэм, цIыф къызэрыкIохэм амалэу, кIуачIэу яIэр зэкIэ ра­хьылIагъ.

Гъунэпкъэ гъэнэфагъэхэм ате­тэу къэралыгъор зыпсэурэр шIэхэу илъэс хъущт. Узыр зэрэбгъэ­хъужьыщт шIыкIэр, ар къызхэкIыгъэр икъу фэдизэу къагурымыIоу врачхэр гумэкIыгъуабэхэм яолIагъэх, ау тIэкIу-тIэкIузэ ащ узэре­бэныщт шIыкIэр агъэунэфыгъ, вакцинэри къаугупшысыгъэу непэ игъэкIотыгъэу ахалъхьэ. Узым къыгъэлъэгъуагъ непэ мы сэнэ­хьатым тищыIэныгъэ чIыпIэшхо зэрэщиубытырэр, ащ мэхьанэшхо зэ­риIэр ыкIи цIыфым ипсауны­гъэрэ ищыIэныгъэрэ анахь лъапIэ дунаим зэрэтемытыр.

Коронавирусыр къызежьагъэм щегъэжьагъэу врачхэм ащыщыбэхэм яIофшIэн имызакъоу, узым пэуцужьыгъэнымкIэ нэмыкI пшъэ­рылъхэри агъэцэкIэнхэ фаеу хъу­гъэ. Ахэм зэу ащыщ непэ зигугъу къэтшIыщт бзылъфыгъэ ныбжьыкIэри. Хъут Рузанэ АР-м псауныгъэр къэухъумэгъэнымкIэ къэралыгъо учреждениеу «Адыгэ­къалэ имежрайон сымэджэщэу К. М. Батмэным ыцIэ зыхьырэм» и Теуцожь сымэджэщ иполиклиникэ участковэ врач-терапевтэу, кардиологэу Iоф щешIэ. Зисэнэхьат хэшIыкIышхо фызиIэ спе­циалист, цIыфхэм ишIуагъэ аригъэкIыным, упчIэжьэгъу афэхъуным сыдигъуи фэхьазыр.

Пандемиер къызежьагъэм щегъэжьагъэу медицинэм иучреж­дениехэм ямызакъоу, цIыфхэм щыIэкIэ-псэукIэу яIагъэм зэхъо­кIыныгъабэ зэрэфэхъугъэр Рузанэ къыхегъэщы.

— Температурэ, хэужъыныхьэгъэ уз зиIэхэр, плъыр-стыр зыкIэтхэр шъхьафэу учреждением етэгъэблагъэх, ахэм ящыкIэгъэ IэпыIэгъур ятэгъэгъоты. Джащ фэдэу пэIудзыгъэ шIыкIэм тетэу Iоф тэшIэ, сымаджэхэм уп­чIэ­жьэгъу тафэхъу, ящыкIэгъэ Iэзэныр афэтэгъэнафэ. Транспорт къытэпхыгъэшъ, тиIофхэр бэкIэ нахь псынкIэ къешIы. Медикхэм язакъоу мы узым пэуцужьынхэ алъэкIыщтэп, арышъ, пстэуми тызэкъотыным, зэгурыIоныгъэ тазыфагу илъыным мэхьанэшхо иI. АР-м и ЛIы­шъхьэ, профильнэ министерствэм, район администрацием яшIогъэшхо къытагъэкIы, а IэпыIэгъур зэхэтэшIэ, типащэхэм тафэраз, — еIо Хъут Рузанэ.

Рузанэ Теуцожь районым ит къуаджэу Нэчэрэзые къыщы­хъугъ. 2000-рэ илъэсым гурыт еджапIэр дышъэ медалькIэ къыухыгъ. Мы илъэс дэдэм Пшызэ къэралыгъо медицинэ университетым чIэхьагъ ыкIи зыкIэхъопсырэ сэнэхьатыр зэригъэгъотыгъ. 2006 — 2008-рэ илъэсхэм мы апшъэрэ еджапIэм госпиталь терапиемкIэ икафедрэ епхыгъэу клиническэ ординатурэм еджэныр щылъигъэ­кIо­тагъ, нэужым кардиолог сэнэ­хьатым феджагъ. Медицинэм имызакъоу экономикэм епхыгъэ сэнэхьати зэригъэгъотыгъ.

2008-рэ илъэсым врач ныбжьыкIэм иIофшIэн ригъэжьагъ, 2012-рэ илъэсым ишышъхьэIу мазэ щыублагъэу непэрэ ма­фэхэм нэс участковэ терапевт, кардиолог. Къуаджэхэу Аскъэлае, Нэчэрэзые, Пщыкъуйхьаблэ, селоу Краснэм ыкIи къутырэу Колосым ащыпсэухэрэм яфэIо-фашIэхэр егъэцакIэх.

— Участковэ врач-терапевтым пшъэрылъ шъхьаIэу иIэхэм ащыщ цIыфхэм игъом ыкIи икъоу медицинэ Iэпы­Iэгъу аригъэгъотыныр. Сыма­джэ­хэр поликлиникэм зэращысыуплъэкIухэрэм, сызэряIа­зэрэм дакIоу, къысэп­хыгъэу щыт фельдшер­-мамыку IэзапIэ­хэми къякIуалIэх, ахэм си­шIуа­гъэ зэряз­гъэкIыщтым сыпылъ. IэпыIэгъу сызфэхъугъэ цIыф­хэм ягущыIэ фабэхэр зэ­хэсхымэ, сэркIэ зымыуасэ щыIэп. ГущыIэм пае, аскъэлаехэм инэу сафэраз, мы къуаджэм щыпсэухэрэм сащыщым, сыря­пшъашъэм фэдэу салъытэ, сыди­гъуи дахэу къыспэгъокIых. Ащи кIуачIэ къысеты, сиIофшIэн нахьышIоу зэрэзгъэпсыщтым сыфещэ, — еIо врачым.

Рузанэ исэнэхьаткIэ бэ къы­зэрэдэхъурэр ыкIи иIофшIэн хэшIыкIышхо фызиIэ специалистэу зэрэщытыр къаушыхьаты, къагъэшъыпкъэжьы гущыIэгъу тызфэхъугъэ цIыфхэм. Бзылъфыгъэ ныбжьыкIэм бэхэм ишIуа­гъэ аригъэкIыгъ, алъэ тыри­гъэуцожьыгъэх, ар зымыуасэ щыIэп. ИIофшIэн дакIоу цIыфышIоу зэрэщытыр, Iэдэб хэлъэу зэрэзекIорэр, сымаджэм еушъыин, игумэкIыгъо шъхьащихын зэрилъэкIырэр бэхэм къыхагъэщы. СамаджэмкIэ гущыIэ дахэми мэхьанэшхо иI, сыда пIомэ врачым къыриIорэр ащ ышIошъ мэхъу, ыгу ре­убытэ. Рузанэ а пстэури иIоф­шIэн къыщыделъытэ.

Медицинэ IэпыIэгъур нахь Iэрыфэгъу хъуным фэшI графикэу щыIэм диштэу врачымрэ медицинэ сестрамрэ тхьамафэ къэс псэупIэхэм ащэIэх, сыма­джэхэр ауплъэкIух, ла­бораторнэ ушэтынхэм апае сымаджэхэм лъыр аIахы. Джащ фэдэу Рузанэ зипсауныгъэ зэ­щыкъогъэ цIыфхэм, сэкъатныгъэ зиIэхэм, ветеранхэм, нэмыкIхэм адэжь макIо. ИщыкIагъэ хъумэ, специалист зэфэшъхьафхэр — неврологыр, хирургыр, УЗИ­-диагностикэм иврач зыдещэх. Участковэ Iоф­шIэ­ным дакIоу врач-кардиологэу мэлажьэ ыкIи ­непэрэ мафэм ехъулIэу Рузэнэ закъу ары Теуцожь район поликлиникэм гум еIэзэрэ специалистэу иIэр. Стационарым къы­чIатхыкIыжьы­гъэхэм алъэплъэ ыкIи яIазэ.

— IофшIэным дакIоу шIэныгъэу сIэкIэлъхэм зэрахэзгъэхъощтым сишъыпкъэу сыпылъ, ащ пае егъэ­джэн семинархэм сахэла­жьэ. Ащ фэдэ екIолIакIэм ишIуа­гъэкIэ сисэнэхьат ишъэф­хэр къызIэкIэзгъэ­хьан, медицинэм ылъэныкъокIэ щыIэ технологиякIэхэм нэIуасэ зафэсшIын, сиIофшIэнкIэ ахэр згъэфедэнхэ амал сиIэ мэхъу. Сыдигъуи сэркIэ пшъэрылъ шъхьаIэу щытыр зы — къы­сэолIэгъэ цIыфым узэу иIэр згъэунэфыныр ыкIи ащ IэпыIэгъу сыфэхъуныр ары, — еIо врач ныбжьыкIэм.

Рузанэ иIофшIэн хэшIыкIы­шхо зэрэфыриIэр, районым щы­псэу­хэрэр, пащэхэр къызэрэфэразэхэр къаушыхьаты щытхъу ыкIи рэзэныгъэ тхылъ пчъагъэу къыфагъэшъошагъэхэм. АР-м псауныгъэр къэухъумэгъэнымкIэ и Министерствэ, Теуцожь район администрацием, къоджэ псэупIэхэм ящытхъу ыкIи ярэзэныгъэ тхылъхэр къылэжьы­гъэх. БэмышIэу ахэм джыри зы къахэхъуагъ. Зэпахырэ узэу ко­ронавирусым пэшIуекIогъэным зиIахьышIу хэлъ Хъут Рузанэ Адыгэ Республикэм и ЛIышъхьэ ирэзэныгъэ тхылъ къыратыгъ.

Бзылъфыгъэ ныбжьыкIэм непэ гухэлъыбэ зыдиIыгъ, ау пстэуми анахь шъхьаIэу къыхигъэщырэр цIыфхэм псауныгъэ яIэныр, мы уз Iаеу къежьагъэр шIэхэу къызэтынэкIыныр ары. АщкIэ ежь къытефэрэр зэкIэ щытхъу хэлъэу егъэцакIэ, цIыф­хэри инэу къыфэразэх. Ме­дицинэм уриIофышIэу щытмэ ащ фэдэ фыщытыкIэр пстэуми апшъэу щыт.

Иунагъо псауныгъэр илъынэу, къыхихыгъэ сэнэхьатым гу­хахъо хигъуатэзэ Iоф ышIэнэу, цIыфхэм шъхьэкIафэу къыфа­шIырэм къыщымыкIэнэу Хъут Рузанэ фэтэIо. Мыщ фэдэ спе­циалистхэр непэ къэралыгъоми, республикэми ящыкIагъэх.

ТХЬАРКЪОХЪО Адам.