2020-рэ илъэсым Адыгеим имагистральнэ зэхэшыпыкI гупчэ почтэ тIупщыгъо миллиони 6-м ехъу ышIыгъ. Пандемием емылъытыгъэу, почтэ тIупщыгъохэм япчъагъэ республикэм щыхэхъуагъ.

Адыгеим щыпсэухэрэм икIыгъэ илъэсым посылкэ ыкIи ЕМС тIупщыгъо мини 100-м ехъу (ар 2019-рэ илъэсым ебгъап­шэмэ, процент 19-кIэ нахьыб) ашIыгъ, къафэкIуагъэр — мин 300-м ехъу (проценти 7-кIэ нахьыб).

— Коронавирусым илъэхъан почтэ фэIо-фашIэхэр псынкIэу ыкIи щынэгъончъэу афэдгъэцэкIэнхэм фэшI Iэрыфэгъу шIы­кIэхэр къэдгъотыгъэх. Ащ пае республикэм иотделение инитIур мэфибл IофшIэным тедгъэ­хьагъэх. Почтэм къекIолIэнхэм фэшI цIыфхэм пэшIорыгъэшъэу зыхатхэн амал яIэ хъугъэ, — хигъэунэфыкIыгъ федеральнэ къэралыгъо учреждениеу «Урысыем и Почтэ» икъутамэу Адыгеим щыIэм ипащэу Антонина Полухинам.

Цифрэ шIыкIэ амалхэм яшIуа­гъэкIэ почтэм къакIохэрэм яфэ­Iо-фашIэхэр афагъэцэкIэнхэм тырагъэкIодэрэ уахътэр бэкIэ нахь макIэ хъугъэ. Ащ пае Урысыем и Почтэ ыкIи компанием исайт ямобильнэ едзы­гъохэр Адыгеим щыпсэухэрэм нахь къызфагъэфедэ. ГущыIэм пае, къутамэм къэмыкIохэзэ, унэм исхэу посылкэм епхыгъэ тхьапэхэр атхых ыкIи ыпкIэ аты. Нэужым почтэм къэкIохэшъ, чэзыум хэмытхэу а тхьапэр операторым раты. Джащ фэдэ шIыкIэкIэ республикэм исхэм тIупщыгъо мин 70-рэ фэдиз икIыгъэ илъэсым ашIыгъ.

Iэшъынэ Сусан.