Лъыхъон Iофтхьабзэхэр лъагъэкIуатэх
Урысые народнэ фронтым ишъолъыр къутамэу Адыгэ Республикэм щыIэм иактивистхэм Хэгъэгу зэошхом хэкIодэгъэ красноармейцэу Сергей Селюковым ищыIэныгъэ гъогу фэгъэхьыгъэ къэбар къаIэкIэхьагъ.
Ар Санкт-Петербург къикIыгъ. КъызэрэчIэкIыгъэмкIэ, мэшIогъэкIосэ-техническэ еджапIэм дзэкIолIыр щеджэщтыгъ.
БлэкIыгъэ илъэсым ОНФ-м илIыкIохэмрэ Урысыем илъыхъон движение ишъолъыр къутамэрэ зэгъусэхэу Сергей Селюковым иIахьылхэм якъэгъотын рагъэжьагъ. 2025-рэ илъэсым Ленинградскэ хэкум къыщычIахыгъэ медальоным ишIуагъэкIэ, иунагъо Мыекъуапэ зэрэщыщыр нафэ хъугъэ.
А лъэхъаным Санкт-Петербург къэралыгъо университетым икупэу «Ингрия» зыфиIорэм дзэкIолIхэм ямедальонищ къагъотыгъагъ. Ау атетхагъэм илъэситф тешIагъэу ары къеджэнхэ залъэкIыгъэр. Урысые къэбарлъыгъэIэс-лъыхъон гупчэу «Отечество» зыфиIоу Казань дэтым ушэтыныр щашIыгъ.
КомпьютерымкIэ зы медальоным Iоф зыдашIэ нэуж, унагъор зыщыпсэущтыгъэр къыраджыкIын алъэкIыгъ: къалэу Мыекъуапэ, урамэу Комсомольскэм иунэу N 181, Селюкова Лукерье Федот ыпхъур. ТIэкIу тешIагъэу ар зытхыгъэ солдатыр лъыхъон купым хэтхэм къагъэнэфэн алъэкIыгъ. Сергей Селюков Карпов ыкъор 1917-рэ илъэсым къэхъугъ. НКВД-м ия 20-рэ шхончэо дивизие ия 7-рэ полк икрасноармейцэ 1941-рэ илъэсым чъэпыогъум и 27-м псыхъоу Нева исэмэгу нэпкъ дэжь щыфэхыгъ.
— Красноармейцэм фэгъэхьыгъэ къэбарыр къызытIэкIахьэм, иIахьылхэм талъыхъунэу едгъэжьагъ. Урамэу Комсомольскэм тет унэу N 181-м Iофтхьабзэр щедгъэжьагъ. Медальоным ит адресым джы республикэ сымэджэщыр тет. Ау унэхэм атет пчъагъэхэм зэхъокIыгъэ афэхъугъэн ылъэкIыщт. IофшIэнхэр хъарзынэщым щылъыдгъэкIотагъ, — къыIуагъ лъыхъон движением ишъолъыр къутамэ ипащэу, ОНФ-м иактивистэу Иван Партноим.
Iофышхоу ашIагъэм ишIуагъэкIэ курсантэу Селюковым фэгъэхьыгъэ къэбарыр лъыхъуакIохэм къагъотыгъ. Мыекъуапэ дэтэу джыри зы адрес агъэунэфыгъ — урамэу Перекопскаям иунэу N 27-рэ.
— Мыщ тызэкIом, джырэ уахътэ исхэр илъэсищ хъугъэу зэрэщыпсэухэрэр зэдгъэшIагъ. Ахэр апэ исыгъэхэм афэгъэхьыгъэ къэбарым щыгъуазэхэп, гъунэгъухэми зи ашIэрэп. Ау унэм пылъ тхылъыр къаухъумэн алъэкIыгъ. 1894-рэ илъэсым къыщегъэжьагъэу ащ датхэщтыгъэх. Джырэ уахътэ ащ дэтыр зэтэгъафэ. Адыгеим ыкIи нэмыкI шъолъырхэм ащыпсэухэрэм зафэтэгъазэ, заом щыфэхыгъэ дзэкIолIым иIахьылхэр къэдгъотыжьынхэмкIэ IэпыIэгъу къытфэхъунхэу, — къыIуагъ И. Партноим.
Абрэдж Сэтэнай.