Илъэс къэс Хэгъэгу зэошхом ихъугъэ-шIэгъэ тхьамыкIагъохэр нахь къытпэчыжьэ мэхъух. Ау лIыхъужъныгъэу советскэ цIыфхэм зэрахьагъэр ныбжьи тщыгъупшэштэп.

Щылэ мазэу икIыгъэр а зэо илъэсхэр джыри тыгу къэзыгъэ­кIыжьырэ мафэхэмкIэ баигъэ. Мары мы блэкIыгъэ бэрэскэ­шхом, щылэ мазэм и 29-м, Хэгъэгу зэошхом илъэхъан Адыгеим нэмыц техакIохэр зырафыжьыгъэхэр илъэс 78-рэ зэрэхъугъэр хагъэунэфыкIыгъ.

Мэзихырэ пыим тихэку къыдзыхьагъэу ыIыгъыгъ. 1943-рэ илъэсым икъихьагъур ары ар шъхьафит ашIыжьынэу тидзэхэм зырагъэжьэгъагъэр.

Ащ ыпэрэ мафэм, щылэ мазэм и 28-м, Хэгъэгу зэошхом илъэхъан апэрэ бзылъфыгъэу Советскэ Союзым и ЛIыхъужъ хъугъэ патриоткэ ныбжьыкIэм лIыхъужъныгъэу зэрихьагъэм фэгъэхьыгъэ фильмэу «Зоя» зыфиIорэм ипремьерэ Урысыем икинотеатрэхэм ащыкIуагъ.

1942-рэ илъэсым щылэ мазэм и 28-р ары нэмыцхэм жъалымагъэ дызэрахьэзэ аукIыгъэ комсомолкэ ныбжьыкIэу Зоя Космодемьянскэр советскэ дзэхэм къызагъотыжьыгъагъэр. Ащ ыуж лIыхъужъныгъэу зэрихьагъэм икъэбар чыжьэу зыIугъэр.

А мафэм тефэу фильмэр къагъэлъэгъуагъ. Илъэситф хъу­гъэшъ Iофтхьабзэу «ЗояГерой» зыфиIорэр Урысыем щызэхащэ. Ащ къыдыхэлъытагъэу комсомолкэ лIыбланэм исурэтхэр социальнэ нэкIубгъохэм къарагъахьэх.

«Россельхозбанкым» иIофышIэхэри мыгъэ ащ хэлэжьагъэх.

— «Урысые мэкъумэщ бан­кым» и Адыгэ шъолъыр къутамэ иIофышIэхэм лъэшэу ягуап анахь хъугъэ-шIэгъэ тхьамыкIагъоу хэгъэгум итарихъ къыхэнагъэм илIыхъужъхэм непэ къызнэсыгъэм ягугъу зэрашIырэр, ахэм яшIэжъ къэралыгъом зэригъэлъапIэрэр, — къыIуагъ къутамэм ипащэу Борсэ Къэплъан. — Мыгъэ илъэс 80 хъу­гъэ комсомолкэ ныбжьыкIэм лIыхъужъныгъэ зэрихьи ыпсэ зитыгъэр. Щынагъоу хэлъыр къыгурыIозэ ар разведчик-диверсант купым хэхьэгъагъ. Зоя Космодемьянскэр Хэгъэгу зэошхом илъэхъан советскэ народым лIыхъужъныгъэу зэрихьагъэм итамыгъэу щыт, патриотизмагъэу хэлъыгъэр щысэте­хыпI.

Щылэ мазэм хагъэунэфыкIыгъэхэм ащыщ Ленинград блокадэр зытырахыжьыгъэр илъэс 77-рэ зэрэхъурэр. «Блокадный хлеб» зыфиIорэ Iофтхьабзэу Урысыем щыкIуагъэр ары зыфэгъэхьыгъагъэр.

Ащ дакIоу Холокостым хэкIодагъэхэм яшIэжь мафэ фэгъэ­хьыгъэ Iофтхьабзэхэр зэрэдунаеу щызэхащэгъагъэх. 1945-рэ илъэ­сым щылэ мазэм и 27-м нэмыцхэм Польшэм щагъэпсыгъэгъэ концлагерэу «Освенцим» гъэрэу щаIыгъыгъэхэр советскэ дзэхэм шъхьафит ашIыжьы­гъагъэх.

«Россельхозбанкым» и Адыгэ шъолъыр къутамэ ипресс-къулыкъу.