«ЭкоЦентрэм» къеты
ЕкIолIапIэхэр аубытых
Фэтэрыбэу зэхэт унэхэм ачIэсхэм апае хэкIитэкъупIэу агъэнэфагъэхэм яекIолIапIэхэр унэе автотранспортым зэрэрагъэубытырэр нахьыбэ хъугъэ. Мафэ къэс пIоми хъунэу шъолъыр операторым иавтомашинэхэр ащ рехьылIэх.
Нахьыбэу ащ фэдэ къызщыхэкIырэр унэе транспортыр зыщынахьыбэ Мыекъуап, Адыгэкъал, поселкэхэу Яблоновскэр, Инэм. Зыгъэпсэфыгъо мэфитIум, шэмбэт-тхьаумафэхэм, нахьыбэр яунэхэм арысышъ, щагухэм уцупIэу яIэр афэмыхъоу, контейнерхэм адэжь агъэуцу. ЕтIанэ пыдзафэхэр Iузыщыщт автомашинэр екIолIэжьышъурэп.
Фэтэрыбэу зэхэт унэхэм ачIэсхэм контейнерхэм яекIолIапIэхэр яавтомашинэхэм арамыгъэубытынхэу, сакъыныгъэ къызхагъэфэнэу компаниеу «ЭкоЦентрэр» къялъэIу.
Илъэсым щыщэу мэфэ 365-м…
Шъолъыр операторым иколл-гупчэ илъэсым имэфэ 365-м хэзыгъэ имыIэу Iоф ешIэ, операторхэм цIыфэу телефонымкIэ къытеохэрэм яупчIэхэм джэуапхэр аратыжьых, ищыкIагъэмэ IэпыIэгъу афэхъух.
— ЦIыфхэм ащ тетэу зэпхыныгъэ зэрадытиIэм хэкIым иугъоинкIэ Iофхэм язытет тылъыплъэнэу, пшъэрылъхэр икъоу ыкIи игъом дгъэцэкIэнхэу амал къытеты. Зы упчIэ джэуапынчъэу къанэ хъущтэп. Уахътэм къызэригъэлъэгъуагъэмкIэ, пыдзафэхэм ядэщын, ащ ыуасэ икъэлъытэн шапхъэу апылъыр цIыфым зэхэугуфыкIыгъэу къыфаIуатэмэ, гумэкIыгъоу иIагъэр дэгъэзыжьыгъэ хъоу бэрэ къыхэкIы, — къыIуагъ ООО-у «ЭкоЦентрэм» и Адыгэ шъолъыр къутамэ ипащэу Алыбэрд Налбый.
Телефонэу шъукъызэрэтеон шъулъэкIыщтхэр шъугу къэтэгъэкIыжьых: 8.800-707-05-08 ыкIи 8(8772)21-06-00. «Линие плъырым» мафэ къэс, пчэдыжьым сыхьатыр 7-м къыщегъэжьагъэу пчыхьэм 8-м нэс, Iоф ешIэ, зыгъэпсэфыгъо ыкIи мэфэкI мафэхэри ащ хэхьэх.
Джащ фэдэу пыдзафэхэм ядэщын епхыгъэ упчIэ зиIэхэр диспетчерскэ къулыкъуми пчэдыжьым 8-м къыщыублагъэу пчыхьэм 5-м нэс къытеонхэ алъэкIыщт. Номерыр: 8-962-868-14-62.
ООО-у «ЭкоЦентрэм» и Адыгэ шъолъыр къутамэ ипресс-къулыкъу. НэкIубгъор зыгъэхьазырыгъэр ХЪУТ Нэфсэт.