Урысыем и Кубок атлетикэ онтэгъумкIэ къы­дэхыгъэным фэгъэхьыгъэ зэнэкъокъур щылэ ма­зэм и 25-м къыщегъэжьагъэу мэзаем и 1-м нэс къалэу Старый Оскол щыкIуагъ.

Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зы­хьырэм зыщызыгъэсэрэ Дзэсэжъ Аслъан зэIукIэгъухэм ахэлэжьагъ.

Кощхьаблэ щапIугъэ нарт ­батырыр килограмм 67-м нэс къэзыщэчыхэрэм якуп хэтэу щы­лычым ебэныгъ. ТIоштэгъукIэ кг 280-рэ къыIэтыгъ (127+153), хэ­гъэгум тыжьыныр къыщыдихыгъ.

Къоджэ спортым къыхэкIыгъэ Дзэсэжъ Аслъан иапэрэ тренерыр Сэнащэкъо Адам. Джырэ уахътэ атлетикэ онтэгъум фэзыгъасэрэр спортымкIэ дунэе класс зиIэ мастерэу Сихъу Аслъан.

— Хэгъэгум и Кубок къыдэ­хыгъэным Дзэсэжъ Аслъан дэ­гъоу зыфигъэхьазырыгъ, — къытиIуагъ Адыгэ Республикэм атлетикэ онтэгъумкIэ испорт еджапIэу М. Чыржьыным ыцIэ зыхьырэм ипащэу, спортымкIэ дунэе класс зиIэ мастерэу Сихъу Рэмэзан. — Килограмм 67-рэ къэзыщэ­чы­хэрэм якуп нэбгырэ 22-рэ щызэнэкъокъугъ. Дзэсэжъ Аслъан икъулайныгъэ дэгъоу ыгъэ­фе­дагъ, ятIонэрэ чIыпIэр къызэри­хьыгъэр гъэхъагъэкIэ фэтэлъэгъу.

Адыгэ къэралыгъо университетым физкультурэмрэ дзюдом­рэкIэ и Институт Дзэсэжъ Аслъан щеджэ. ИшIэныгъэ зэрэхигъахъорэм дакIоу, спортышхом ишъыпкъэу пылъ.

2020-рэ илъэсым Адыгэ Рес­публикэм испортсмен ныбжьыкIэ анахь дэгъуи 10-у къыха­хыгъэмэ А. Дзэсэжъыр ащыщ. 2021-рэ илъэсым хэгъэгу ыкIи дунэе зэIукIэгъухэм А. Дзэсэ­жъыр ахэлэжьэн имурад.

Икъоджэ гупсэ щыригъажьи, спортыр зищыIэныгъэ щыщ хъугъэ Дзэсэжъ Аслъан къызэрэ-ти­Iуагъэу, Адыгеим спортсмен цIэ­рыIуабэ щапIугъ, ахэр щысэ фэхъух.

Сурэтхэм арытхэр: Сихъу Ас­лъан, Дзэсэжъ Аслъан, Сихъу Рэмэзан; хагъэу­нэфыкIырэ чIыпIэхэр къыдэ­зы­хыгъэхэм афэгушIох.