Адыгэ Республикэм иминистрэхэм я Кабинет изэхэсыгъоу Адыге­им и ЛIышъхьэу КъумпIыл Мурат тыгъуасэ зэрищагъэм лъэпкъ про­ектхэмрэ къэралыгъо программэхэмрэ ягъэцэкIэн епхыгъэ Iофы­гъо­хэм щатегущыIагъэх. Коронавирусыр къапымыпкIэным пае вакцинэ зыхара­гъэлъхьан зэрэфаем епхыгъэ Iофыгъор анахь шъхьаIэу мыщ къыщаIэтыгъэхэм ащыщ. Адыгэ Республикэм ивице-премьерэу Наталья Широковам зэхэсыгъом къызэрэщиIуагъэмкIэ, вакцинэу «Спутник V» зыфиIорэр ахалъхьэу республикэм щырагъэ­жьагъ. 2021-рэ илъэсым мэ­къуогъум и 1-м нэс нэбгырэ мини 192,1-м ехъу ащ къыхырагъэубытэнэу рахъухьэ. Мыщ хэхьэх медицинэ организациехэм, гъэсэныгъэ языгъэгъотырэ организациехэм, социальнэ лъэныкъом, промышленностым яIофышIэхэр, къулыкъушIэхэр, хэбзэухъумэкIо къулыкъухэм ащылажьэхэрэр, дзэ къулыкъум ащэнэу щытхэр, студентхэр, зыныбжь илъэс 60-м шIокIы­­­гъэхэр, хэужъыныхьэгъэ уз зи­­Iэ­хэр. Муниципальнэ обра­зо­ваниехэм вакцинэр защыхалъ­­хьащт чIыпIэ 26-рэ, ар зы­щаIы­гъыщт чIыпIи 10, прививкэ зы­шIыщт бригадэхэр ащызэ­хаща­гъэх. Ахэм анэмыкIэу мобильнэ комплекситIуми Iоф ашIэщт.

Коронавирусым цIыфхэр щыухъумэгъэнхэм мэхьанэшхо зэриIэр, вакцинациер дэх имы­Iэу гъэцэкIэгъэн зэрэфаер Адыгеим и ЛIышъхьэ джыри зэ агу къыгъэкIыжьыгъ.

«Вакцинацием изэхэщэнкIэ ищыкIагъэр зэкIэ къытIэкIэ­хьэгъах. Пшъэрылъэу тиIэр рес­публикэм исхэм коронавирусыр къапымыпкIэным пае шIуагъэ къытэу мы Iофтхьабзэр зэхэт­щэныр ары. Вакцинэм изещэн­кIэ, иIыгъынкIэ, цIыфхэм ар ахэлъхьэгъэнымкIэ блэкI имыIэу шапхъэхэр къыдалъытэнхэ фае. Мы Iофтхьа­бзэм шIуагъэу къытыщтыр цIыф­хэм агурыгъэIо­гъэн, ящыкIэгъэ къэбархэр алъыгъэIэсыгъэн фае. прививкэ зязыгъэшIы зышIоигъохэр чэзыу­хэм ахэмы­­тынхэм пае Адыгэ Респуб­ли­кэм псауныгъэр къэухъумэгъэнымкIэ и Министерствэ испециалистхэр яIоф­шIэн зэхъо­­кIы­ныгъэ горэхэр фэ­хъунхэ зэрилъэ­кIыщтым фэ­хьазырынхэ фае», — хигъэунэфыкIыгъ КъумпIыл Мурат.

Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем зэхэсыгъом къызэрэщиIуагъэмкIэ, ковиднэ госпиталищмэ чIыпIэу яIэм ипроцент 65-р ары джыдэдэм агъэфедэрэр. Коронавирусыр къызэуталIэхэрэм зыщяIазэщтыгъэхэ отделение хэушъхьафыкIыгъэхэм ыпэкIэ зэрэщытыгъэм фэдэу Iоф ашIэу аублэжьыщт, япланхэм адиштэу операциехэр ашIыщтых.

КъумпIыл Мурат зэхэсыгъом икIэух къызэрэщиIуагъэмкIэ, ведомствэ гъэнэфагъэхэм коронавирусым пэуцужьыгъэнымкIэ оперативнэ штабым иунашъохэр блэкI имыIэу агъэцэкIэнхэ фае. ЗыгорэкIэ зэпахырэ узымкIэ Iофхэм язытет нахь дэй къызыхъукIэ, медицинэ IофышIэхэр яIофшIэн зэхъокIыныгъэхэр фашIынхэм фэхьазырынхэ фае.

АР-м и ЛIышъхьэ ипресс-къулыкъу