Мы илъэсым зиIофшIэн езыгъэжьагъэхэм

IофшIапIэ Iут пэпчъ IофшIэгъэ илъэ­сэу иIэр зыщыгъэнэфэгъэ тхы­лъыр (трудовая книжка) нахьы­пэ­кIэ зэрэщытыгъэм тетэу къыгъэнэ­жьы­щтымэ, хьауми электроннэ шIы­кIэм техьащтмэ къыхихынэу икIыгъэ илъэсым амал иIагъ.

Къихьэгъэ 2021-м апэрэу IофшIапIэм Iухьэхэрэм ятхылъхэр электроннэ шIыкIэм тетэу гъэпсыгъэ­щтых.

IофшIэгъэ илъэсхэр зыщыгъэнэфэгъэ тхылъ иIэу, ау ушъхьагъу гъэнэфагъэм ыпкъ къикIыкIэ, ар зэ­рэгъэпсыгъэщтыр икIыгъэ илъэсым итыгъэгъазэ и 31-м нэс къыхимыхышъугъэмэ, джы лъэIу тхылъыр ытын фит. Ушъхьагъу хъун ылъэкIыщт, гущыIэм пае, цIыфым IофшIапIэр чIинэгъагъэмэ, кIэлэцIыкIу къы­фэхъугъэу, ащ пае отпуск щыIагъэмэ.

«Трудовой книжкэр» нахьыпэкIэ зытетыгъэм тетэу къэзыгъэнэжьыгъэр кIэгъожьыгъэмэ, зэблихъужьын фит. Ащ пае IофшIэпIэ чIыпIэр къезытыгъэм лъэIу тхылъ фитхын фае. Электроннэ шIыкIэм техьагъэхэм, ыпэкIэ яIэгъэ тхылъыр къаратыжьышъ, ар агъэкIоды хъущтэп.

IофшIэпIэ чIыпIэхэр къэзытыхэрэм кадрэхэмкIэ зэхъокIыныгъэу яIэ хъурэм ПенсиехэмкIэ фондыр электроннэ шIыкIэм тетэу, пIалъэу законым щы­гъэнэфагъэм шIомыкIэу щагъэгъозэн фае. «Трудовой книжкэр» зэрэгъэпсыгъэщтым фэгъэхьыгъэу лъэIу тхылъыр мы илъэсым къезытыгъэхэм афэгъэхьыгъэ къэбарыр мэзэе мазэм и 15-м шIомыкIэу къылъа­гъэIэсынэу законым къыщеIо. ИIофшIапIэ Iутэу, ау 2020-рэ илъэсым итыгъэгъазэ и 31-м нэс лъэIу тхылъ къэзымытыгъэхэм яIофшIэгъэ илъэсхэр зыщыгъэнэфагъэр нахьыпэрэм тетэу къыгъэнэжьын фае.

IофшIапIэм Iутхэм, IукIыжьыгъэхэм е къаштагъэхэм афэгъэхьыгъэ къэбарэу «СЗВ-ТД» зыфиIорэ шIыкIэм тетэу гъэпсыгъэр ащ фэгъэхьыгъэ унашъом ежь «работодателым» зыкIэтхагъэм ыужырэ мафэм шIомыкIэу ПенсиехэмкIэ фондым IэкIигъэхьанэу щыт. ЦIыфыр нэмыкI IэнатIэ ыгъэкIуагъэмэ, отделым е подразделением ацIэ зэблэхъугъэ хъугъэмэ, а мазэм къыкIэлъыкIорэм и 15-м нэс пIалъэу иIэр.

IофшIапIэ Iут пэпчъ «итрудовой книжкэу» электроннэ шIыкIэм тетэу гъэпсыгъэм икъэбар, къэралыгъо фэIо-фашIэхэм япортал е ПенсиехэмкIэ фондым щигъэпсыгъэ «унэе кабинетыр» къызфигъэфедэхэзэ, зэригъэшIэн ылъэкIыщт. Тхьапэм тетыр фондым е МФЦ-м якIуалIэмэ къырагъэлъэгъущт.

2020-рэ илъэсэу икIыгъэм Адыгеим щыпсэоу нэ­бгырэ 92038-мэ, ар IофшIапIэ Iутхэм япроцент 97,8-рэ мэхъу, яIофшIэгъэ илъэсхэр зыщыгъэнэфэгъэ тхылъыр зэрэгъэпсыгъэщтыр къыхахыгъ. Электроннэ шIыкIэр нахьышIоу зылъытагъэр нэбгырэ 9967-р ары.

Федеральнэ фэгъэкIотэнхэр зиIэхэм

Мэзаем и 1-м къыщыублагъэу УФ-м ПенсиехэмкIэ ифонд ыгъэнэфэрэ со­циальнэ ахъщэ тынхэм ащыщхэм къахэхъуагъ.

Индексациер 2020-рэ илъэсым уасэхэм зэраха-хъорэ индексым къыпкъырыкIыхэзэ агъэнэфагъ.

Ащ тетэу федеральнэ фэгъэкIотэнхэр зиIэхэм мазэ къэс къафэкIорэ ахъщэ тыныр проценти 4,9-кIэ нахьыбэ хъугъэ. Ащ фэдэ тын афагъэнафэ сэкъатныгъэ зиIэхэм, кIэлэцIыкIухэри ахэтхэу, радиацием иягъэ зэригъэкIыгъэхэм, Хэгъэгу зэошхом, нэмыкI зэо-зэпэуцужьхэм яветеранхэм ыкIи сэкъатныгъэ ахэзыхыгъэхэм, нэмыкIхэм.

2021-рэ илъэсым ищылэ мазэ и 1-м нэс пштэмэ, ащ фэдэ ахъщэ тын къыфакIоу Адыгеим исыр нэ­бгырэ 40766-рэ мэхъу.

Социальнэ фэIо-фашIэхэм ауасэу ащ хахьэрэри индексацие шIыгъэу къафэкIощт. Мы мазэу къихьагъэм къыщегъэжьагъэу ар сомэ 1211-рэ чапыч 66-рэ зэрэхъущтыр.

Социальнэ фэIо-фашIэхэм ахэхьэх:

— Iэзэгъу уцхэр, медицинэ псэуалъэхэр, сэкъатныгъэ зиIэ кIэлэцIыкIухэм апае гъомылапхъэхэр, шхыныгъохэр ыпкIэ хэмылъэу аIэкIэгъэхьэгъэнхэр (ащ пае сомэ 933-рэ чапыч 25-рэ щыгъэнэфагъ);

— IэзэпIэ-зыгъэпсэфыпIэм зэрэкIощт путевкэр ыпкIэ хэмылъэу етыгъэнэу (соми 144-рэ чапыч 37-рэ ащ телъытагъ);

— ащ зэрэкIощтым пае ыпкIэ хэмылъэу мэшIокугъогу ыкIи нэмыкIэу къалэхэр зэзыпхырэ транспортыр ыгъэфедэнэу (мыщ пае соми 134-рэ чапыч 04-рэ къыдэлъытагъ).

Джащ фэдэу мэзаем и 1-м къыщегъэжьагъэу Iоф­шIапIэм Iумытыжь пенсионерыр дунаим ехыжьыгъэмэ, ащ игъэтIылъын пае ПенсиехэмкIэ фондым къытырэ ахъщэми къыхэхъуагъ. Джы ар сомэ 6424-рэ хъущт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу