ИкIыгъэ 2020-рэ илъэсым АР-м иминистрэхэм я Кабинет, «Рос­сети» зыфиIорэ купыр ыкIи компаниеу «Россети Кубань» инвестиционнэ проектхэм япхырыщынкIэ Iоф зэрэзэдашIэщтым фэгъэхьыгъэ зэзэгъыныгъэм зэдыкIэтхагъэх.

Зэрагъэнэфагъэм тетэу 2021-у къихьагъэм энергетик­хэм киловатти 110-рэ къэ­зы­тырэ подстанциеу «Адыгейская» зыфиIорэмрэ кило-ватт 35-рэ къэзытырэу «Кужорскэмрэ» акIуачIэ хэгъэ­хъогъэным фэшI икIэрыкIэу агъэ­псыжьыщтых. КъэкIощт 2022-рэ илъэсым «Черемушки», «Северная» зыфиIорэ подстанциехэу киловатти 110-рэ зырыз кIуачIэу зиIэхэр уахътэм диштэу ашIы­жьыщт, киловатт 35-рэ зырыз къэзытырэ подстанциехэу «Инэм», «Комбизавод» зыфиIохэрэри икIэрыкIэу агъэпсыжьыщтых.

Ащ къыкIэлъыкIорэ 2023-рэ илъэсым подстанциеу «ИКЕА» зыфиIорэр агъэкIэ­жьыщт, электричествэр зэ­бгырызытIупщырэ сетеу ащ екIурэр зэблахъущт, кIуапIэ­хэр кIэу ашIыщтых.

Мы проектхэр пхырыщыгъэхэ зыхъукIэ электроэнергиемкIэ кIуачIэхэр мегавольт-­ампери 195-кIэ нахьыбэ хъу­щтых.

Шъугу къэдгъэкIыжьын, 2018 — 2020-рэ илъэсхэм рес­публикэм иэлектросетьхэм язегъэушъомбгъун компаниеу «Россети Кубань» сомэ миллиардым ехъу пэIуигъэхьагъ. Мы уахътэм ехъулIэу счетчик «Iушхэу» мин 45,6-рэ ыгъэуцугъ. Ащ ишIуагъэкIэ чIэнагъэхэр киловатт миллиони 103-кIэ зы сыхьатым нахь макIэ хъугъэ, ар сомэ миллион 370-рэ. А ахъщэр рес­публикэм электроэнергиемкIэ иинфраструктурэ изегъэу­шъомбгъун пэIохьажьых.

ХЪУТ Нэфсэт.