Кавказ биосфернэ заповедникым зекIо гъогу­кIэ къыщызэIуахыгъ. ЗекIо гупчитIоу Краснэ По­лянэмрэ Лэгъо-Накъэрэ ащ зэрэзэрипхыщтыр за­поведникым ипресс-къулыкъу къыщаIуагъ.

Краснэ Полянэм щыIэ хьакIэхэр джы вертолетым исхэу заповедникым къэкIонхэ алъэкIыщт. Ащ зыщаплъыхьан, нэужым Лэгъо-­Накъэ зыщагъэпсэфынышъ, агъэзэ­жьын амал яIэ хъугъэ. Мыщ фэгъэхьыгъэ зэзэгъыныгъэ Кавказ заповедникым ипащэхэмрэ авиациемкIэ къезыщэкIыхэмрэ зэда­шIыгъ. Шапхъэхэм адиштэу ар щы­тыщт. Заповедникым дэс псэу­шъхьэхэм ярэхьатныгъэ амыукъоу чыжьэкIэ ахэр арагъэлъэгъущтых, къушъхьэхэм ядэхагъэ къарагъэплъыхьащт.

ЗекIом сыхьатитIу-тфы фэдиз ыхьыщт. Кавказ заповедникым иIофышIэхэр ягъусэхэу хьакIэхэр гъогу техьэхэзэ ашIыщт. ЗыгъэпсэфыпIэ дахэу щыIэхэм, чIыопсым изытет зыфэдэм, псэушъхьэу мыщ хэсхэм ыкIи къыщыкIыхэрэм якъэ­бар къафаIотэщт. Лэгъо-Накъэ къы­зыщыуцухэкIэ, лъэсэу къакIу­хьан, хьэхэм зэращэрэ жэхэмкIэ къыщечъэкIынхэ алъэкIыщт.

Джащ фэдэу зекIом имузей чIащэщтых, мы чIыпIэм тарихъэу пылъыр къафаIотэщт.

Такъикъ 20-кIэ Краснэ Полянэм нэсыжьыщтых.

Мы мафэхэм зекIо гъогур зэ­рэгъэпсыгъэр пащэхэм апэрэу ауплъэкIугъ.

— Вертолетым уисэу гъогум утеты зыхъукIэ, чIыопсым идэхагъэ зэрэплъэгъурэм нэмыкIэу, мы чIыпIэхэм тарихъэу апылъыр зэбгъэшIэн плъэкIыщт. ЗекIо гъо­гукIэр шIэхэу зэлъашIэнэу ыкIи агу рихьынэу къысшIошIы, — еIо ­Кавказ заповедникым ипащэу Сергей Шевелевым.

Делэкъо Анет.