Адыгэ Республикэм и Къэралыгъо автоинспекторхэмрэ цIыфхэм социальнэ фэIо-фашIэхэр афэзыгъэцэкIэрэ гупчэу Мыекъуапэ дэтым и «Тыжьын волонтерхэр» зыфиIорэмрэ пэшIорыгъэшъ Iофтхьабзэу «Щынэгъончъэ ­гъогур – тинахьыжъхэм апай» зыфиIорэр рагъэкIокIыгъ.

Щынэгъончъэ гъогухэр тиIэнхэм алъа­псэр зэфыщытыкIэу гъогурыкIоным хэлажьэхэрэм зэфыряIэм, пшъэдэкIыжьэу ахьырэр зэрэзэхашIыкIырэм зэрялъытыгъэр зэхэщакIохэм хагъэунэфыкIыгъ. ЛъэсрыкIохэм сакъыныгъэ къызхагъэфэным ыкIи чIыпIэ гъэнэфагъэхэм гъогур ащызэпачыным ахэр къыфэджагъэх.

Нэфынэр къэзытырэ пкъыгъохэр зыхэмылъхэм анаIэ тырадзагъ. Ащ фэдэ зыухъумэхэрэ пкъыгъохэр зыщамыгъэгъупшэнхэу зэрэщытыр, ахэм яшIуагъэкIэ транспорт амалхэр зезыфэхэрэм нахь къызэралъэгъухэрэр Iофтхьабзэм изэхэщакIохэм къаIотагъэх. Нэфынэр къэзытырэ пкъыгъо зэфэшъхьафхэу инспекторхэмрэ волонтерхэмрэ къагъэхьазырыгъэхэр нахьыжъхэм афагощыгъэх.