ГуфакIохэм я Адыгэ республикэ движениеу «Культурэм иволонтерхэр» зыфиIорэм зэха­хьэу иIагъэм зэфэхьысыжьхэр щашIыгъэх, яму­радхэм атегущыIагъэх.

2017-рэ илъэсым Адыгэ Рес­публикэм искусствэхэмкIэ иколледжэу Тхьабысымэ Умарэ ыцIэ зыхьырэм Адыгеим игуфакIохэм ядвижение и Гупчэ щы­зэхащагъ. Волонтерхэр культурэм нахьышIоу къыхэщэгъэнхэм, яIофшIэн нахь зэгъэфагъэу лъыгъэкIотэгъэным афэшI Гупчэр зэIукIапIэ афэхъугъ.

Адыгэ Республикэм культу­рэмкIэ иминистрэ игуадзэу, Урысыем, Адыгеим, Ингушетием культурэмкIэ язаслуженнэ IофышIэу ШъэуапцIэкъо Аминэт зэфэхьысыжь зэхахьэм къыщыгущыIагъ. «Культурэм иволонтерхэм» яIофшIагъэ анахьэу къыщыхигъэщыгъэр республикэм культурэмкIэ и Министерствэрэ волонтерхэмрэ зэгъусэхэу Iофыгъохэм зэхэщакIо зэрафэхъухэрэр ары.

Республикэм культурэмкIэ и Министерствэ иIофтхьабзэхэу ТекIоныгъэм ия 75-рэ илъэс, творчествэм пылъ цIыфхэм, лъэп­къым иIэпэIасэхэм, шэн-хабзэ­хэм, нэмыкIхэм афэгъэхьыгъэхэм волонтерхэр чанэу ахэлэжьагъэх.

Хэгъэгу зэошхом, патриоти­ческэ пIуныгъэм, ныбжьыкIэхэм языгъэпсэфыгъо уахътэ гъэ­шIэгъонэу агъэкIоным, зыныбжь хэ­кIотагъэхэм алъыплъэнхэм, фэшъхьафхэм яхьылIэгъэ зэха­хьэхэм волонтерхэр къащэгущыIэх.

— ЗэIукIэгъухэр волонтерхэм дэгъоу зэращэнхэм фэгъэсагъэх, — къыIуагъ ШъэуапцIэкъо Аминэт. — Волонтерхэр цIыфхэм яупчIэжьэгъух.

Лъэпкъ проектэу «Культурэм» къыхиубытэу шъолъыр программэу «Творческэ цIыфхэр» зыфи­Iорэр щыIэныгъэм щыпхыращы, «Культурэм иволонтерхэр» зыфиIорэ программэр агъэцакIэ.

Къэралыгъо программэм къы­дыхэлъытагъэу республикэ бюд­жетым къыхахи, сомэ мини 100 волонтерхэм япроект пэIуагъэ­хьагъ.

Культурэм иволонтерхэр студентых, япчъагъэкIэ 60-м къе­хъух. Япшъэрылъхэр анахь дэгъоу зыгъэцэкIагъэхэм ШъэуапцIэкъо Аминэт афэгушIуагъ. ШIу­­хьафтынхэр зэратыжьыгъэхэм ащыщхэр: Гъунцокъо Мади­нэ, Мария Глушкор, Лариса Яко­венкэр, Анастасия Себзалие­вар, Максим Лавриненкэр, Мария Ку­лий, Мария Костенкэр, Екатерина Нассо­новар, КIуашъэ Бес­лъан, Куфэнэ Мариет, нэмыкIхэр.

Адыгэ Республикэм культу­рэм­кIэ и Министерствэ волонтер­хэм лъэшэу афэраз. ЩыIэныгъэм ди­штэу рагъэжьэгъэ Iофыр лъагъэкIотэным фэшI мурадэу яIэхэм атегущыIагъэх. 2021-рэ илъэ­сым «культурэм иволонтерхэр» Iофтхьабзэхэм чанэу зэ­рахэ­лэжьэщтхэм, опытэу яIэр зэрагъэфедэщтым тицыхьэ телъ.