Адыгеим и ЛIышъхьэу КъумпIыл Мурат тхьамэтагъор зыщызэрихьэгъэ зэхэсыгъоу тыгъуасэ Адыгэ Республикэм и Правительствэ зычIэт унэм щыкIуагъэм республикэм иэлектроэнергетикэ хэхъоныгъэ ышIынымкIэ зэшIохыгъэн фаехэм щатегущыIагъэх.

Джащ фэдэу зэхэсыгъом хэлэжьагъэх ПАО-у «Россети Кубань» игенеральнэ пащэу Сергей Сергеевыр, Адыгэ Рес­публикэм ивице-премьерэу Сапый Вячеслав, Адыгэ Респуб­ликэм экономикэ хэхъоныгъэм­рэ сатыумрэкIэ иминистрэу Шэуджэн Заур, республикэм иведомствэ заулэмэ ялIыкIохэр, ПАО-у «Россети Кубань» игенеральнэ пащэ игуадзэхэр.

Адыгэ Республикэм и ЛIышъхьэ зэрэхигъэунэфыкIыгъэмкIэ, инфраструктурэхэм ягъэпсын пае пэшIорыгъэшъ IофшIэнхэр мы аужырэ илъэсхэм шъолъырым щызэрахьагъэх. Джыдэдэм республикэм иэлектросетевой комплекс уахътэм диштэу агъэ­кIэжьэу аублагъ. ПстэумкIи 2021 — 2023-рэ илъэсхэм мы лъэныкъом сомэ миллиарди 4,2-рэ къыхалъхьащт.

«Урысыем и Правительствэрэ ПАО-у «Россети» иправлениерэ яшIуа­гъэкIэ мы лъэныкъом тыщылъыкIотагъ. Мы Iофыгъом изэшIохынкIэ Адыгеим ыцIэкIэ Урысые Федерацием и Къэралыгъо Думэ идепутатэу, Урысые политикэ партиеу «Единэ Россием» хэтэу Владислав Резник ишIогъэшхо къытигъэкIыгъ. Джы гъогу картэхэм адиштэу Iоф­тхьабзэхэр зетхьанхэ фае. ПАО-у «Россети Кубань» зыфиIорэмрэ респуб­ликэмрэ аIэ зэкIэдзагъэу зэрэзэдэлажьэхэрэм елъыты­гъэщт лъэпкъ проектхэр, Адыгеим хэхъоныгъэ зэришIыщт унэе программэр гъэцэкIагъэ зэрэхъущтхэр. Тэхъутэмыкъое районым индустриальнэ паркэу «Яблоновскэр», Адыгеим икъушъ­хьэлъэ чIыпIэхэм турист кластерыр ащыгъэпсыгъэнхэм, псэолъэшIыным зегъэушъом­бгъугъэным апае энергетическэ псэуалъэхэр тищыкIагъэх», — къыIуагъ КъумпIыл Мурат.

ПАО-у «Россети Кубань» игенеральнэ пащэу Сергей Сергеевым зэхэсыгъом зэрэщыхигъэунэфыкIыгъэмкIэ, Урысые Федерацием и Правительствэ 2020-рэ илъэсым итыгъэгъазэ зыкIэтхэгъэ документым тетэу ПАО-у «Россети Кубань» докапитализацие ашIыщт. Электроэнергетикэм ипсэуалъэхэр Адыгэ Республикэм зэрэщагъэ­псыщтхэ мылъкур къыхагъэкIыгъах.

«Компанием иинвестиционнэ программэ хэт псэолъэ 11-мэ япроектхэр непэкIэ агъэхьазырых. Псэуалъэхэр зашIыщт, подстанциехэр загъэкIэжьыщт пIалъэхэр агъэнэфагъэх, псэуа­лъэ пэпчъкIэ Iофэу ашIэщтхэр рахъухьагъэх», — къыIуагъ Сергей Сергеевым.

ЗэдашIыгъэ зэзэгъыныгъэм диштэу энергокомпаниемрэ республикэмрэ тапэкIэ зэдэлэжьэныгъэ зэрэзэдыряIэщт шIыкIэм нэужым зэхэсыгъом щытегущыIагъэх. Энергопсэуа­лъэхэм ятIупщынкIэ, инвестиционнэ площадкэхэм, унэхэм, социальнэ объектхэм ягъэ­псынкIэ зэрэзэдырагъэштэн фаем зэхэсыгъом анаIэ щытырарагъэдзагъ.

Адыгэ Республикэм и ЛIышъхьэ ипресс-къулыкъу