Урысые зэнэкъокъум хэлэжьэщт
Мыекъопэ гурыт еджапIэу N 7-м хьисапымкIэ икIэлэегъаджэу Сергей Левченкэр Урысые зэнэкъокъоу «Илъэсым икIэлэегъадж— 2020» зыфиIорэм ифинал ихьагъ.
Педагогикэм ылъэныкъокIэ IэпэIэсэныгъэр зыщаушэтырэ зэнэкъокъур щылэ мазэм и 24-м къыщегъэжьагъэу мэзаем и 2-м нэс къалэу Волгоград щыкIощт.
КIэлэегъэджэ сэнэхьатым епхыгъэ зэнэкъокъум Урысыем ишъолъыр зэфэшъхьафхэм къарыкIыгъэ нэбгырэ 85-рэ хэлажьэ.
«Методическая мастерская» зыфиIорэ ушэтыныр зэнэкъокъум иапэрэ едзыгъоу хъугъэ. Методикэм зэрэщыгъуазэхэр ыкIи кIэлэеджакIохэм яегъэджэн, япIуныгъэ ылъэныкъокIэ IэпэIэсэныгъэу аIэкIэлъымкIэ яIофшIэгъухэм адэгощэнхэр мыщ къыдыхэлъытагъ.
Егъэджэн материалыр практикэм зэрэщыбгъэфедэщтыр къызэрэхэпхыщт шIыкIэр къизыIотыкIырэ тхыгъэ гъэшIэгъонэу ыгъэхьазырыгъэр Сергей Левченкэм къаригъэлъэгъугъ. Егъэджэн шIыкIэу «Стеллаж» зыфиIоу хьисапымкIэ кIэлэегъаджэм ыгъэфедэрэр жюрим шIогъэшIэгъоныгъ.
ЯтIонэрэ едзыгъоу зыпхырыкIыщтхэр «Урок» зыфиIорэр ары. Ащ лауреат нэбгырэ 15-р къыгъэнэфэщт. Нэужым къыкIэлъыкIощтых класснэ сыхьатхэр ыкIи мастер-классхэр. Зэфэхьысыжьхэм ялъытыгъэу жюрим нэбгыри 5 къыхигъэщыщт. Ахэр пресс-зэIукIэу «Вопрос учителю года» зыфиIорэм хэлэжьэщтых. Мэзаем и 2-м мэфэкI шIыкIэм тетэу зэнэкъокъур зэфашIыжьыщт, текIоныгъэр къыдэзыхыщтым ыцIэ ащ къыщыраIощт.
Iэшъынэ Сусан. Сурэтыр ыкIи къэбарыр Мыекъопэ къэлэ администрацием исайт къитхыгъэх.