Вакцинэр зыщахалъхьащт чIыпIэхэм ахагъэхъуагъ
COVID-19-м пэуцужьырэ вакцинэм ихэлъхьан епхыгъэ игъэкIотыгъэ Iофтхьабзэр Адыгеим етIупщыгъэу щэкIо. Къалэу МыекъуапэкIэ ащ фэдэу зы чIыпIэ щыIагъэмэ, джыри ащ щы хагъэхъуагъ ыкIи пстэумкIи чIыпIи 4-мэ цIыфхэр якIолIэнхэ алъэкIыщт. Вакцинациер къалэм зэрэщыкIорэм къытегущыIагъ Мыекъопэ къэлэ IэзапIэу N1-м иврач шъхьаIэу ЕмтIылъ Оксанэ.
— Блыпэм къыщегъэжьагъэу коронавирусым пэуцужьырэ прививкэр зыщахалъхьащт чIыпIэхэр къызэIуахых, — къеIуатэ ащ. — Апэу къызэIуахыгъэ студент поликлиникэм хэтыр къэнэжьы, ащ нэмыкIэу джыри 3-мэ яIофшIэн аублэщт. Ахэр урамхэу Чкаловым ыцIэ зыхьырэм иунэу N 77-м, Комсомольскэм иунэу 159-м, я 7-рэ Переулкэу 16-м атет поликлиникэхэр.
Вакцинэм ихэлъхьан епхыгъэ IофшIэныр мафэ къэс рекIокIыщт. IофшIэгъу мафэхэм пчэдыжьым сыхьатыр 9-м къыщегъэжьагъэу мафэм 4-м нэс зэхэщэгъэщт. Шэмбэтым сыхьатыр 9 – 14-м урамхэу Чкаловым, Комсомольскэм ыкIи Жуковскэм къащызэIухыгъэ чIыпIэхэм якIолIэнхэ алъэкIыщт. Iоф зышIэхэу къемыкIолIэшъухэрэм апае, нэбгырэ пчъагъэу къыкIэлъэIухэрэр зикъухэкIэ, тхьаумэфэ мафэм вакцинациер афызэхащэнэу агъэнафэ.
ЕмтIылъ Оксанэ къызэриIуагъэмкIэ, прививкэ зыхязгъэлъхьанэу кIощтым шIокI имыIэу паспортыр ыкIи СНИЛС-р ыIыгъынхэ фае.
— Коронавирусым пэуцужьырэ вакцинэр аукъодыеу къыпхалъхьанэу щытэп. УпчIэжьэгъу тхьапэр ыкIи ежь ишIоигъоныгъэкIэ зыхаригъэлъхьаным зэреуцолIагъэр цIыфым ытхынхэу щыт. Нэужым терапевтыр къеплъыщт. Врачым хъунэу зилъытэкIэ, уколым ишIын такъикъитIу ыхьырэр. Ащ ыуж такъикъ 30-рэ прививкэр зыхалъхьагъэм ипсауныгъэ изытет лъэплъэх, — къыIуагъ врач шъхьаIэм.
Джащ фэдэу ащ зэрэхигъэунэфыкIыгъэмкIэ, вакцинациер къызежьагъэм къыщегъэжьагъэу (Iоныгъом аублагъ) МыекъуапэкIэ нэбгырэ 1204-у прививкэ ашIыгъэхэм къямыкIугъэу, дао яIэу агъэунэфыгъэп. ЦIыфэу зыхэзылъхьэ зышIоигъохэм япчъагъэ къыщыкIэрэп, мы тхьамафэм нэбгырэ 600-мэ зарагъэтхыгъ.
Коронавирусым пэуцужьырэ вакцинэм ихэлъхьан епхыгъэ Iофтхьабзэр джыри шIэхэу Адыгеим щаухыщтэп. ШIоигъоныгъэ зиIэ пстэуми ар ахалъхьащт, игъорыгъоу вакцинэр республикэм къащэ. Тыгъуасэ хэлъхьагъу 1400-рэ къалэм къыIэкIэхьагъ, бэ темышIэу джыри 1200-рэ къэкIощт.
Iэшъынэ Сусан.