2021-рэ илъэсым щылэ мазэм и 23-м хэбзэгъэуцугъэр аукъозэ зэхащэгъэ Iофтхьабзэхэм зыныбжь имыкъугъэхэр хэлэжьагъэх. Ар зиIэшIагъэр шIошъ­хъуныгъэ горэ зимыIэ цIыфхэр ары. Ахэр интернет нэкIубгъохэмкIэ закъыфагъазэзэ, кIэлэцIыкIухэмрэ зихэхъогъу­хэмрэ мыхъун ашIэнэу, хэбзэихъухьа­гъэр аукъонэу къяджэх.

Ны-тыхэм сакъыныгъэ къызхагъэфэнэу тыкъя­лъэIу. А Iофтхьабзэхэм язэхэщакIохэм кIэлэцIыкIоу зэкIэми цыхьэ афэзышIыхэрэр, интернетым ихъухьэрэ пстэур тэрэзэу зылъы­тэхэрэр агъэфедэх, ау ежьхэр чыжьэу щытых. Къэралыгъом иэкономикэ зэтезгъэзын, бырсыр къизылъхьан зыгу хэлъ политикхэм яджэгунхэм шъуисабыйхэр ахяшъумыгъащэх.

«Адыгэ Хасэм» и Тхьаматэу ЛIымыщэкъо Рэмэзан.

Адыгэ Республикэм ыкIи Пшызэ шъолъыр ащыпсэурэ быслъымэнхэм я ДиндэлэжьапIэ мэщытым къекIуалIэхэрэм якIэлэцIыкIухэм языгъэпсэфыгъо уахътэ зэрэзэхэщагъэм, ар зэрагъакIорэм анаIэ тырагъэтынэу къяджэ. «Нымрэ тымрэ анахьышIоу ялъфыгъэ фашIэн алъэкIыщтыр тэрэзэу апIуныр ары» ыIуагъ Пегъым­бар Мыхьамодэм.

Ны-тыхэм пшъэрылъ шъхьаIэу яIэр шIум якIэлэцIыкIу фагъэсэныр, ем щаухъумэныр ары. ГухэкIми, джы тэ тлъэгъурэр унагъом зэгурыIоныгъэу илъыр, нахьы­жъым фыряIэ лъытэныгъэр зыукъорэ шэн Iаехэм тикIэлэцIыкIухэр афагъэсэнхэм ыуж зэритхэр ары. Джыдэдэм, къыт­кIэхъу­хьэрэ лIэужхэр хэбзэгъэуцугъэр аукъозэ зэхащэрэ Iофтхьабзэхэм ахагъэлэжьэнхэм, политикэм хащэнхэм ыуж зыщитыхэ лъэхъаным, ар щынагъо мэхъу. КIэлэцIыкIухэр кIэлэцIыкIоу къэнэжьынхэ, ащ гухахъо хагъотэн фае. Ахэр тинеущырэ мафэх. Арышъ, хымэ цIыфхэм агъэIорышIэнхэу ыуж зэритхэм щыухъумэгъэнхэм унагъо пэпчъ пылъын фае.

Адыгэ Республикэм ыкIи Пшызэ шъолъыр ащыпсэурэ быслъымэнхэм ямуфтий шъхьаIэу Къэрдэн Аскэрбый.